«Սոցիալական շարժումը» քաղաքական ենթատեքստ չունի եւ զբաղվելու է բացառապես սոցիալական խնդիրներով։ Սա է պատճառը, որ Կրթության եւ գիտության նախկին փոխնախարար, ՀՀԿ խմբակցության նախկին պատգամավոր Վահրամ Մկրտչյանը համաձայնել է դառնալ շարժման անդամ:
«Կարծում եմ, այսօր Հայաստանում կան բազմաթիվ տարերային սոցիալական խնդիրներ, տարբեր շահագրգիռ խմբեր իրենց հարցերը բարձրացնելով, կարողանալու են կազմակերպել որոշակի գործընթացներ։ Մենք այս շարժումը նախաձեռնել ենք, որպեսզի այդ գործընթացներն ավելի ընդգրկուն դառնան։ Ըստ իս, այս գործընթացում մենք չունենք հակառակորդներ, որովհետև բոլորը բարեկամներ են և իշխանությունը, և մասնավոր հատվածը, քանի որ չեմ կարծում, որ Հայաստանում կգտնվի մեկ կառույց, որը դեմ կարող է լինել, որ հայ ժողովուրդը ապրի ոչ բարեկեցիկ պայմաններում»,-այսօր «Սոցիալական շարժման» հիմնադրման համաժողովի ժամանակ, լրագրողների հետ զրույցում ասաց Վահրամ Մկրտչյանը։
Վահրամ Մկրտչյանը կարծում է, որ «Սոցիալական շարժման» թիմով կկարողանալու են լուծել երկրում առկա սոցիալական խնդիրները: Դրա համար ժամանակ կպահանջվի, այն դանդաղ գործընթաց է. «Մենք փետրվարին նախատեսել ենք, որ Մարզահամերգային համալիրում կանցկացնենք համաժողով՝ բազմաթիվ մասնակիցների ներկայությամբ, որտեղ ցույց կտանք ավելի կազմակերպված ու մեծ հնարավորություններ։ Մենք բաց ենք բոլորի առաջ եւ ցանկացած անհատ ու կազմակերպություն կարող է անդամակցել այս շարժմանը»:
Նելլի ԳՐԻԳՈՐՅԱՆ
Կարդացեք նաև
