Լեռնահովիտ հասնելու համար երկու ճանապարհ կա՝ կամ պիտի հատես Արգիճի գետի վրա կառուցված կամուրջը, կամ անցնես Սելիմի լեռնանցքով։ Արգիճիի ձախակողմյան ափին փռված բնակավայրը տեղի և կողքի բնակիչների մեջ հայտնի է նաև Լեռնակերտ և Քյասիբաշ անուններով։
1967 թվականին Լեռնահովիտ համայնքը՝ քիչ բնակչություն ունենալու պատճառով (վերջին տվյալներով՝ 500 ընտրող) միացվել է իրենից 6 կմ հեռավորության վրա գտնվող Գեղհովիտ համայնքին։ Տեղացիների խոսքով «միացումից հետո միակ բանը, որ փոխվեց, Լեռնակերտից դարձանք Լեռնահովիտ»:
Տեղի բնակչության հիմնական զբաղմունքը հողագործությունն է և անասնապահությունը։ Բնակավայրն ունի մի շարք խնդիրներ, որոնց մեջ հրատապ և առաջնային է դպրոցի նոր շենքի կառուցումը։
Բնակավայրի երեխաները մինչ օրս հաճախում են 1937 թվականին կառուցված դպրոցական շենքը։ Այն գործում է խիստ անբավարար պայմաններում։ «Մանկավարժական համալրված կոլեկտիվից և աշակերտներից բացի ուրիշ ոչինչ չունենք»,-ասում է դպրոցի տնօրեն Սպարտակ Մխիթարյանը:
Քառասուն աշակերտ ունեցող դպրոցը երկհերթ է՝ առանց մարզադահլիճի, կենտրոնացված ջեռուցման և անհրաժեշտ այլ պայմանների։ «Աշակերտները սովորում են մինչև 9-րդ դասարան։ Դրանից հետո ուսումը շարունակում են կա’մ կողքի գյուղի` Մադինայի միջնակարգ դպրոցում, կա’մ քոլեջներում»,-նշեց պարոն Մխիթարյանը։
Շենքի կողքին է տեղավորված մի վագոն-տնակ, որը ծառայում է որպես ուսուցչանոց։ Իսկ դիմացի հանդատեղին էլ մարզադաշտն է մինչև ձյան գալը։
Տեղի բնակիչների խոսքով՝ այստեղ ձյունը գալիս է շուտ և չի հալվում մինչև ապրիլի վերջ: Դպրոցականները ձմռանը ստիպված հատում են Լեռնահովիտը Մադինային կապող կամրջով: Դպրոցի տնօրեն Սպարտակ Մխիթարյանի խոսքով՝ խոստացել են, որ այս անգամ վերջապես կլուծեն այդ խնդիրը, համայնքը կունենա հիմնովին նոր կառուցված դպրոցական շենք:
Ինչպես տեղեկացանք Գեղարքունիքի մարզպետ Գնել Սանոսյանի ֆեյսբուքյան էջից.«Լեռնահովիտում նոր դպրոց կառուցելու խնդիրն այսօր փորձում է հոգալ Գեղարքունիքի մարզպետարանը ֆրանսիական «Bonheure Rertrouve» բարեգործական ասոցիացիայի հետ համատեղ ուժերով։ «Bonheure Rertrouve» բարեգործական ասոցիացիան ծրագրել է Ֆրանսիայում բարեգործական համերգներից ու այլ հանգանակություններից հավաքագրված միջոցների հաշվին իր նպաստը բերել Լեռնահովիտ բնակավայրի նոր դպրոցի կառուցմանը»:
Նաիրա ԿԱՐԱՊԵՏՅԱՆ
