«Առաջնորդության դպրոցի» հերթական հրավերով ՎիվաՍել-ՄՏՍ-իգլխավոր տնօրեն Ռալֆ Յիրիկյանը «Երազել եւ իրականացնել» խորագրով բաց դաս է անցկացրել «Ռամադա Հոթել ընդ Սուիթս բայ Ուինըմ Երեւան» հյուրանոցում:
Դասախոսության ընթացքում Ռալֆ Յիրիկյանն առանձնացրել է մի շարք կարեւոր ու առանցքային որակներ ու հմտություններ, որոնք անհրաժեշտ են առաջնորդի սեփական ուղին կերտելու համար:
Ինչպես Յիրիկյանը նշել է. «Առաջնորդ լինելու համար պետք է կարողանալ օրինակ ծառայել, եւ առաջնորդության այս բանաձեւի հիմքում բարոյական արժեքներ են: Չէ՞ որ առաջնորդելը չպետք է լինի ինքնանպատակ, այլ պետք է բխի տեսլականից ու այն կյանքի կոչելու կամքից, այն կապված է անձնական պատասխանատվության հետ՝ թիմի ու հասարակության առջեւ: Թիմային ոգու ստեղծումն ու նպատակադրումը պահանջում են մոտիվացում՝ անկեղծ ու իրական օրակարգի շուրջ: Ահա սա է առաջնորդի, ղեկավարի առաքելությունը: Այսօրվա թվային իրականության եւ արագ ընթացող փոփոխությունների ու մարտահրավերների պայմաններում հատկապես՝ առաջնորդից պահանջվում են իրապես ստեղծագործական եւ համարձակ լուծումներ: Թվային աշխարհի գործիքների ճիշտ կիրառումը մեծապես օգնում է այս հարցում: Ավելի քան հազարավոր հնարավորություններ են ստեղծվում անընդհատ առաջ շարժվելու, ստեղծելու ու ստեղծագործելու համար»:
Բաց դասի ընթացքում տեղի է ունեցել անկեղծ զրույց ու մտքերի փոխանակում: Ռալֆ Յիրիկյանը պատասխանել է դասախոսության մասնակիցներին հուզող հարցերին, մասնավորապես՝ գործարարության ոլորտի վերաբերյալ իր պատկերացումների մասին:
Կարդացեք նաև
«Առհասարակ, պետք է հաշվի առնել այն, որ «թվայնացումը» միայն տեխնոլոգիաներին չի վերաբերում, ինչպես հաճախ կարելի է լսել, այլ նախեւառաջ՝ մտածողության փոփոխությանը: Սա ռազմավարության, բիզնեսի վարման տրամաբանության խորքային վերանայման հարց է»,-նշել է Յիրիկյանը:
Ռալֆ Յիրիկյանը հավելել է. «Երբ ՎիվաՍել-ՄՏՍ-ը տասնհինգ տարի առաջ սկսեց ծավալել իր գործունեությունը, ոչ ոք չէր էլ կարող ենթադրել, որ կգա մի օր, երբ կկանգնենք հեռահաղորդակցության օպերատորից թվային ծառայությունների օպերատորի փոխակերպման ճանապարհին: Բայց մեր թիմային աշխատանքը, ստեղծագործական միտքն, ուժն ու եռանդը բազմապատկվել են, հարստացել «X», «Y» ու «Z» սերունդների պատկերացումներով, ստեղծել խենթ, բայց եւ իրագործելի գաղափարների հարուստ խառնուրդ (rich mix), որը համարձակություն է ենթադրում ու թույլ չի տալիս վարանելու, հետ կանգնել առաջ գնալու մտքից, բացում է գործունեության նոր հորիզոններ»:
Դասախոսության ընթացքում հարց է հնչել 5G (շարժական կապի հինգերորդ սերնդի ցանց) ներդրման ժամկետների վերաբերյալ: Ռալֆ Յիրիկյանը պատասխանել է, որ 5G ստանդարտն արդեն ուրվագծված է, սակայն շուկայի համար մատչելի գնով սարքեր դեռեւս հասանելի չեն: Գլխավոր տնօրենի կարծիքով, մինչեւ 2 տարի ժամանակ կպահանջվի, մինչեւ այդ սարքերը դառնան հասանելի լայն կիրառման համար:
«Ինչ վերաբերում է հարցին, թե ե՞րբ Հայաստանում կլինի 5G, կպատասխանեմ այսպես. ՎիվաՍել-ՄՏՍ-ը վաղուց է սկսել պատրաստվել 5G-ի ներդրմանը, քանի որ ընկերության 4G ցանցում օգտագործելու նպատակով ներդրվող սարքավորումները կարող են աշխատել նաեւ 5G ցանցում՝ ընդամենը ծրագրային փոփոխության ենթարկվելով»,-ասել է Յիրիկյանը:
Բաց դասի մուտքն ազատ էր, եւ մասնակիցները հնարավորություն էին ստացել մասնակցել բանախոսությանը՝ նախապես գրանցվելով «Առաջնորդության դպրոցի» կայքէջում:
«Առավոտ» օրաթերթ
22.11.2019
