ԵՊՀ աշխատակից, ԵՊՀ ուսանողական ծրագրերի համակարգող Էդուարդ Գալստյանը միացել է ԿԳՄՍ նախարարության օրինագծի դեմ բողոքող ուսանողների գործողություններին «Տեսակետ» մամուլի ակումբում կայացած ասուլիսում նա ասաց, որ ինքը բացառություն չէ եւ իրենց պահանջին ԵՊՀ այլ դասախոսներ ու աշխատակիցներ էլ են միացել, շատերն էլ պատրաստակամություն են հայտնել աջակցել:
«Մեր դժգոհությունը կապված է Հայաստանի Բարձրագույն կրթության եւ գիտության մասին օրենքի շրջանառվող նախագծի հետ, թեեւ պնդումներ կան, որ այն դեռեւս աշխատանքային փուլում է: Ընդհանուր այդ օրենքի նախագիծը բազմաթիվ քննարկումների առիթ է դարձել, ուղարկվել է բուհերին, որտեղ գիտական խորհուրդներում քննարկվել է: Օրենքի նախագծին գրեթե բոլոր բուհերի գիտական խորհուրդները տվել են բացասական պատասխան»,-ընդգծեց նա:
Մանրամասն՝ տեսանյութում
Կարդացեք նաև
Փաստեց, որ որեւէ անդրադարձ չի եղել կոնկրետ Հայոց լեզու, գրականություն եւ Հայոց պատմություն առարկաների պարտադիր դասավանդվելուն, եւ իրենց դժգոհությունը հենց դրա հետ է կապված: Էդուարդ Գալստյանը կարծում է, որ Հայոց լեզու, գրականություն եւ Հայոց պատմություն առարկաները չպետք է հայեցողական հիմունքներով դասավանդվեն. «Նախ եւ առաջ Հայաստանի համար պատրաստվող մասնագետները պետք է տիրապետեն հայոց լեզվին բավարար մակարդակով: Քանի որ ընդունելության քննություններում ոչ բոլոր դեպքերում է հայոց լեզուն միասնական կարգով քննություն հանձնվում, շատ ֆակուլտետների ուսանողներ կամ լավ չեն տիրապետում կամ չեն սովորում հայոց լեզու, նույնը վերաբերում է Հայոց պատմությունը»:
ԵՊՀ աշխատակիցը կարծում է, որ եթե հանրակրթության ոլորտում խնդիրներ չլինեին, եւ 12-րդ դասարանն ավարտածը նորմալ տիրապետեր Հայոց լեզու, գրականություն եւ Հայոց պատմություն առարկաներին, նույնը նորից անցնելու կարիք չէր լինի, բայց քանի դեռ այդ խնդիրը լուծված չէ, ողջամիտ չէ այդ առարկաները ոչ պարտադիր դարձնելը ոչ մասնագիտական ֆակուլտետներում:
Էդուարդ Գալստյանը հայտնեց, որ դասադուլները դադարեցրել են՝ անսալով դասախոսների հորդորներին, եւ այդ քայլը պայմանավորված չէ շրջանառվող այն լուրով, թե նախարար Արայիկ Հարությունյանն ակնարկել է դուրս թողնել դասերից բացակայող ուսանողներին ու հեռացնել ուսանողներին միացած ԵՊՀ աշխատակիցներին: «Այս պահին բողոքի գործողությունները դադարեցված են, սակայն շարունակվում են տարաբնույթ հանդիպումները գիտական խորհուրդների անդամների եւ տարբեր ֆակուլտետների դասախոսների հետ, հանդիպումների արդյունքներն էլ երեւի կամփոփենք երկուշաբթի օրը»,-հայտնեց նա: Հավելեց, որ այս պահին իրենք քննարկում են պահանջում թեմայի շուրջ:
Մանրամասն տեսանյութում՝ քիչ անց:
Գոհար ՀԱԿՈԲՅԱՆ
