Վաշինգտոն – Այսօր Սենատի Արտաքին հարաբերությունների հանձնաժողովի ավագ անդամ Ռոբերտ Մենենդեսը (Դեմոկրատ, Նյու Ջերսի) հայցեց միաձայն համաձայնություն տալ Սենատի բանաձև (S.Res.) 150-ին և իրեն միացավ օրինագծի առաջատար Հանրապետական՝ Սենատոր Թեդ Քրուզը (Հանրապետական, Տեխաս)՝ հաղորդեց Ամերիկայի հայկական համագումարը (Համագումար): Ապրիլին ներկայացված օրինագիծը վայելում է 28 սենատորների երկկուսակցական աջակցությունը:
«Մենք ողջունում ենք Սենատորներ Մենենդեսին և Քրուզին` S.Res. 150-ը Սենատի քննարկմանը հասցնելու իրենց երկկուսակցական ջանքերի համար: Սենատոր Մենենդեսը, հիշելով այն ժամանակվա ԱՄՆ դիվանագիտական ջանքերը հայ ժողովրդին օգնելու համար, կարևորեց նաև անցյալ ամիս Ներկայացուցիչների պալատում նմանատիպ նախաձեռնության ճնշող մեծամասնությամբ հաստատումը՝ 405 կողմ և 11 դեմ ձայների հարաբերակցությամբ: Սենատոր Քրուզը հայտարարեց, որ Հայոց ցեղասպանությունը փաստ է և Թուրքիայի հետ կապված նշեց, որ ընկերներն ու դաշնակիցները կարող են ճշմարտությունն ասել»,- ասաց Համագումարի Գործադիր տնօրեն Բրայան Արդունին:
Ցավոք, միաձայն համաձայնություն տալու հայցմանը առարկեց Սենատոր Դեյվիդ Պերդյուն (Հանրապետական, Ջորջիա)՝ վկայակոչելով «Թուրքիայի հետ շարունակվող դիվանագիտական հարաբերությունները»:
Այս վերջին զարգացումից հետո, Սենատոր Մենենդեսը երդվեց չնահանջել և շարունակել պայքարը այնքան ժամանակ, մինչ Սենատը կընդունի Հայոց ցեղասպանության բանաձևը:
Կարդացեք նաև
«Մեկ Սենատորի առարկությունը, որով նա պնդում է, թե այժմ ժամանակը չէ S.Res. 150-ը քննարկելու համար, անկեղծ չի հնչում: Միշտ էլ ճիշտ ժամանակն է լույս սփռել մարդկության դեմ կատարված հանցագործությունների վրա և ասել ճշմարտությունը»,- շարունակեց Արդունին: «Մենք հորդորում ենք Սենատին գործել և միանալ Ներկայացուցիչների պալատի ճնշող մեծամասնությամբ ու պատմական երկկուսակցական քվեարկությանը՝ դեմ կանգնելով ցեղասպանության ժխտմանը»:
Ամերիկայի հայկական համագումար
