Լեռնային Ղարաբաղի հակամարտության կարգավորումը հնարավոր չէ առանց դրանում ներգրավված բոլոր կողմերի համաձայնության։ Այս մասին ադրբեջանական ԱՊԱ գործակալության հետ զրույցում հայտարարել է ԵԱՀԿ Մինսկի խմբի ռուսաստանցի համանախագահ Իգոր Պոպովը` մեկնաբանելով Ռուսաստանի արտգործնախարար Սերգեյ Լավրովի` Երևանում արած նույնաբովանդակ հայտարարությունը։
«Առանց բոլոր շահագրգիռ կողմերի հակամարտության լուծում հնարավոր չէ։ Պետք է հաշվի առնել տարածաշրջանի բոլոր ժողովուրդների կարծիքը։ Չէ՞ որ համաձայն Հիմնական սկզբունքների բոլոր տարբերակների` փախստականներն ու ներքին տեղահանվածները հնարավորություն կստանան վերադառնալ իրենց նախկին բնակության վայրեր և, հետևաբար, մասնակցություն ունենալ իրենց ապագա ճակատագրի որոշմանը»,- ասել է համանախագահը։
Անդրադառնալով բանակցությունների ձևաչափը փոխելու վերաբերյալ Հայաստանի դիրքորոշմանը` Պոպովն ասել է, որ Ռուսաստանի դիրքորոշումը ձևաչափի հարցում միշտ եղել է հետևողական։ «Մենք բազմիցս ասել ենք, որ մասնակիցների կազմը պետք է որոշեն և համաձայնեցնեն իրենք` կողմերը։ Խորհրդակցությունների և հետագա բանակցությունների նախնական փուլում, երբ ռազմական գործողությունները դադարել էին, Լեռնային Ղարաբաղը մասնակից էր համապատասխան պայմանավորվածությունների և բանակցությունների, որոնք սկսվել էին հրադադարի համաձայնագրի ստորագրումից հետո։ Հետո որոշվեց, որ Ղարաբաղի շահերը կներկայացնի Երևանը։ Եթե ժամանակի ընթացքում կողմերը պայմանավորվեն, որ բանակցային գործընթացին պետք է միանան Լեռնային Ղարաբաղի ներկայացուցիչները, մենք կսատարենք այդ որոշումը»,- ասել է Պոպովը։
Պոպովը նաև նշել է, որ ԼՂ հակամարտության կարգավորումը Ռուսաստանի արտաքին քաղաքականության առաջնահերթություններից է, և իրենք այդ ուղղությամբ սերտորեն աշխատում են մյուս համանախագահ երկրներ Ֆրանսիայի և ԱՄՆ-ի հետ։ Նա նշել է, որ Հայաստանի նոր իշխանությունները բավականին ժամանակ ունեին ծանոթանալու բանակցային գործընթացի բոլոր մանրամասներին, և հույս է հայտնել, որ կողմերը մոտ ապագայում կվերսկսեն բանակցությունները։
Կարդացեք նաև
Պատրաստեց Վիկտորյա ԱՆԴՐԵԱՍՅԱՆԸ
