Փոխվարչապետ Տիգրան Ավինյանը հույս ունի, որ Երեւանի տրանսպորտի խնդիրը 1-3 տարվա ընթացքում կլուծվի: Ավինյանն այսօր մասնակցում էր Երեւանում ընթացող «Արդյունավետ մրցակցության ապահովումը թվայնացվող աշխարհում» ԵԱՏՄ համաժողովին եւ լրագրողների հետ ճեպազրույցում անդրադարձավ որոշ հարցերի:
Մայրաքաղաքի երթուղային տրանսպորտի ամբողջական փոփոխության վերաբերյալ արդեն կա հստակ հայեցակարգ եւ ինչպես Ավինյանն ասաց, քաղաքապետարանն ունի հստակ ծրագիր: Փոխվարչապետը հիշեցրեց՝ 2 անգամ քննարկում է եղել քաղաքապետի, միջազգային դոնոր-գործընկերների եւ ֆինանսների նախարարության հետ. «Կարծում եմ, մեզ համար վերջնական լուծումներն արդեն որոշակիորեն հասկանալի են, որոշակի գործընթաց է տեղի ունենում: Կառավարությունն աջակցում է քաղաքապետարանին այս խնդրի լուծմանը հասնելու հարցում: Հուսով եմ, որ մոտակա 1-3 տարվա ընթացքում մենք կկարողանանք քաղաքում համալիր կերպով լուծել տրանսպորտի հարցը, նաեւ վստահ եմ, որ այս գործընթացը տրանսպորտի կազմակերպման առումով կբերի որակական ահռելի փոփոխության»:
Նելլի ԲԱԲԱՅԱՆ
