Փոխվարչապետ Տիգրան Ավինյանը, որը մասնակցում էր Երեւանում ընթացող «Արդյունավետ մրցակցության ապահովումը թվայնացվող աշխարհում» ԵԱՏՄ համաժողովին, լրագրողների հետ ճեպազրույցում անդրադարձավ Ալավերդու պղնձաձուլարանին: Նա ասաց, որ Հայաստանում պղնձաձուլական նոր համալիրի կառուցման հարցը գտնվում է կառավարության օրակարգում:
Հարցին՝ կառավարությունը մտադիր էր Ալավերդու պղնձաձուլարանի վերաբերյալ բանակցություններ նախաձեռնել, սակայն օրերս հայտնի դարձավ, որ այն շահագործման է տրվել «Թեղուտը» շահագործող ընկերության տնօրենի փեսային՝ Նորիկ Պետրոսյանին, փոխվարչապետը պատասխանեց՝ չինական ընկերության հետ բանակցությունները շարունակվում են:
«Չինական ընկերությունը, նախնական պայմանավորվածության համաձայն, ծրագրում է այցելություն Հայաստան, եւ ես կարծում եմ, որ այդ այցի շրջանակներում ես նույնպես կընդունեմ պատվիրակությանը: Ընդհանուր առմամբ, նոր պղնձաձուլական համալիրի կառուցումը մեր օրակարգում է, որովհետեւ այն, ինչն առկա է Ալավերդիում, արդյունավետ չէ, բնապահպանական տեսանկյունից շատ խնդրահարույց է։ Եվ այն, ինչը հիմա է քննարկվում, գրեթե շատ քիչ կապ ունի նրա հետ, ինչ եղել է նախկինում»,- ասաց Տիգրան Ավինյանը:
Նելլի ԲԱԲԱՅԱՆ
