Ավետիք Էլոյանը դիմել է դատարան: Այս մասին լրագրողների հետ ճեպազրույցում ասաց փոխվարչապետ Տիգրան Ավինյանը՝ պատասխանելով Կադաստրի պետական կոմիտեի նախկին ղեկավար Սարհատ Պետրոսյանի՝ փոխվարչապետի խորհրդական Ավետիք Էլոյանի մասին հայտարարություններին:
Ավինյանի ենթադրությամբ՝ Էլոյանը դատարան է դիմել զրպարտության հարցով:
«Հիմա մի ժամանակաշրջան է, երբ բոլորն անում են տարատեսակ հայտարարություններ: Պետք է հասկանալ, թե այդ հայտարարություններն ինչ նպատակներով են արվում: Նույն պարոն Սարհատ Պետրոսյանի հրաժարականից հետո ես ստանում եմ նամակ Կադաստրի կոմիտեի վարչության պետերից մեկից, որտեղ նա խոսում է 2 տասնյակից ավելի կոռուպցիոն սխեմաների մասին, որը զեկուցվել է պարոն Պետրոսյանին եւ պարոն Պետրոսյանը ըստ իմ ստացած նամակագրության, չի տվել ընթացք: Հիմա պետք է հասկանալ, թե ինչպես վերաբերվել նման հայտարարություններին: Կարծում եմ՝ հիմա մի ժամանակահատված է, որ պետք է շատ հանգիստ վերաբերվել, կտրուկ շարժումներ չանել, վերլուծել, հասկանալ, նաեւ հասկանալ տողատակերը, որովհետեւ այն վարչությունը, որի պետն այդ նամակն ինձ ուղղել է, շուտով փակվելու է, ներքին աուդիտի վարչությունն է: Ուզում եմ ասել՝ բոլոր հայտարարությունների մեջ պետք չի միայն բուն հայտարարությանն ուշադրություն դարձնել, այլ նաեւ հասկանալ մոտիվները, թե ինչու է դա արվում»:
Դիտարկմանը՝ իրավապահները ստուգումներ են իրականացնում Էլոյանի եղբոր ընկերությունում, մտավախություն չկա՞, որ կբացահայտվեն որոշակի կոռուպցիոն կապեր, փոխվարչապետը պատասխանեց. «Կարծում եմ՝ որեւէ գործընթաց, որ տեղի է ունենում, պետք է լինի օրենքին համահունչ: Եթե կան անձինք, ովքեր խախտել են օրենքը, անկախ նրանից, թե ինչ պաշտոն են զբաղեցնում եւ ինչ հարաբերությունների մեջ են այսօրվա բարձրաստիճան պաշտոնյաների հետ, միանշանակ, պետք է ենթարկվեն պատասխանատվության»:
Կարդացեք նաև
Նշենք, որ Տիգրան Ավինյանը մասնակցում է Երեւանում ընթացող «Արդյունավետ մրցակցության ապահովումը թվայնացվող աշխարհում» ԵԱՏՄ համաժողովին:
Նելլի ԲԱԲԱՅԱՆ
