«Ես առաջարկում եմ դատավորներին եւս մեկ անգամ ծանոթանալ նախագծին»,-արձագանքելով ՍԴ դատավորներին վաղաժամ կենսաթոշակի անցնելու մասին նախագծի դատավորների դժգոհությունների մասին լրագրողների հարցերին, պատասխանեց փոխվարչապետ Տիգրան Ավինյանը: Նա մասնակցում է Երեւանում ընթացող «Արդյունավետ մրցակցության ապահովումը թվայնացվող աշխարհում» ԵԱՏՄ համաժողովին:
Հարցին՝ արդյոք կառավարությունը ՍԴ դատավորների հետ կապված խնդիրը լուծի սահմանադրական փոփոխություններով, Ավինյանը պատասխանեց. «Սահմանադրական փոփոխությունները հնարավոր է լինեն մեր օրակարգում, բայց չեմ կարծում, որ միայն այս լոկալ խնդրի ու ճգնաժամի հետ պետք է կապել սահմանադրական բարեփոխումները: Իրականում, սահմանադրական բարեփոխումները պետք է անցնեն համալիր ներառական եւ մասնակցային քննարկումներ, որպեսզի հասկանանք, թե որտեղ ունենք խնդիրներ, եւ ինչ լուծումներ են առաջարկվում»:
Ավինյանի կարծիքով՝ ՍԴ-ում ճգնաժամը եղել է սաղմում, ի սկզբանե. «Որովհետեւ ՍԴ նախագահի ընտրության հետ կապված հարցերը երբեւէ օրակարգից դուրս չեն եղել եւ չեն փարատվել, ինչպես նաեւ որոշակի հավելյալ տեղեկատվություն է ի հայտ եկել, որը կապված է այն գործընթացի հետ, որի մասին խոսեցի՝ նախագահի ընտրության հետ»:
Ավինյանը կառուցողական է համարում կառավարության այն առաջարկությունները, որոնք ուղղված են Սահմանադրական դատարանում առկա ճգնաժամի վերջնական հանգուցալուծմանը. «Ե՛վ մենք, ե՛ւ միջազգային մեր գործընկերներն արձանագրել ենք, որ Սահմանադրական դատարանում կա խնդիր, եթե չասեմ` ճգնաժամ, եւ այդ ճգնաժամին պետք է տրվի լուծում: Այդ լուծման վերաբերյալ առաջարկությունները, որոնք անում է կառավարությունը, շատ կառուցողական են, եւ ընդամենը գործընթաց է, որը պետք է շարունակաբար իրականացնել՝ մինչ ճգնաժամը ստանա իր վերջնական հանգուցալուծումը»:
Կարդացեք նաև
Հիշեցնենք, կառավարությունը հավանություն է տվել Սահմանադրական դատարանի դատավորների վաղ կենսաթոշակային համակարգի ներդրման նախագծին: Ըստ այս նախագծի, եթե մինչեւ 2020 թվականի հունվարի 31-ը Սահմանադրական դատարանի դատավորներն ու նախագահ Հրայր Թովմասյանը, հրաժարական տան, ապա մինչեւ իրենց պաշտոնավարման ժամկետի լրանալը կստանան իրենց աշխատավարձի չափով կենսաթոշակ:
Նելլի ԲԱԲԱՅԱՆ
