2016թ.-ին ՀՀ ոստիկանության ՊՊԾ գունդը զավթած եւ մի շարք ծանր հանցագործությունների կատարման համար մեղադրվող «Սասնա ծռեր» խմբի գործով հերթական դատական նիստում այսօր պետք է հարցաքննվեր երկու ոստիկանի սպանության համար մեղադրվող Սմբատ Բարսեղյանը, սակայն որպես նրա շահերի պաշտպան ներգրավված Տիգրան Եգորյանը միջնորդեց նիստը հետաձգել՝ դատարանից խնդրելով ժամանակ տրամադրել, որպեսզի Սմբատ Բարսեղյանը նախապատրաստվի հարցաքննության:
«Գաղտնիք չունենք դատարանից եւ մեղադրանքի կողմից: Կան փաստական հանգամանքներ եւ նախաքննության արդյունքում ձեռքբերված ցուցմունք: Սմբատ Բարսեղյանը պետք է քննարկի այդ հանգամանքների վերաբերյալ, իմ դիրքորոշմամբ, մեղադրանքից պաշտպանվելու էական կետերը, որոնց վերաբերյալ մենք համապատասխան ցուցմունքով ենք հանդես գալու»,-հայտարարեց փաստաբանը:
Դատավոր Մեսրոպ Մակյանը նշեց՝ Տիգրան Եգորյանի միջնորդությունը ողջամիտ է եւ հիմնավորված. «Երբ նախորդ նիստում հրապարակվեցին Սմբատ Բարսեղյանի նախաքննական ցուցմունքները, նա հայտարարեց, որ այդ պահին հրաժարվում է առանց պաշտպանի ցուցմունք տալ դատարանում»:
Դատավորի որոշմամբ հաջորդ դատական նիստը տեղի կունենա դեկտեմբերի 11-ին:
Կարդացեք նաև
Հիշեցնենք, որ Բարսեղյանը մեղադրվում է ոստիկաններ Արթուր Վանոյանի եւ Յուրի Տեփանոսյանի սպանության համար, իրեն մեղավոր չի ճանաչում:
Լուիզա ՍՈՒՔԻԱՍՅԱՆ
