Արդեն 2 շաբաթ է՝ ԵՊՀ բանասիրական ֆակուլտետի ուսանողները բողոքի գործողություններ են իրականացնում` ընդդեմ բուհերի ոչ մասնագիտական ֆակուլտետներում հայոց լեզվի, հայ գրականության եւ հայոց պատմության ոչ պարտադիր լինելու նախագծի: Նրանք պատրաստվում են իրենց դիմում-նամակը հանձնել ԵՊՀ ռեկտորի ժամանակավոր պաշտոնակատարին եւ գիտական խորհրդին եւ համապատասխան դիրքորոշում ու հայտարարություն են ակնկալում նրանցից` կապված դասախոսների հետ հանդիպման ժամանակ նախարար Արայիկ Հարությունյանի արհամարհական վերաբերմունքի հետ:
ԵՊՀ բանասիրական ֆակուլտետի ուսանող, քայլերթի նախաձեռնող Գեւորգ Գյուլումյանը նշեց, որ պատրաստվում են 3 օրով դադարեցնել քայլերթը, ինչը կապված է դասախոսների հորդորների հետ: «Մենք այսօր ռեկտորի պաշտոնակատարին եւ գիտխորհրդի անդամներին դիմում- նամակներ ենք փոխանցելու, որոնց բովանդակության մասին մանրամասն հանձնելուց հետո կհայտնենք»,-ասաց նա:
Շեշտեց, որ նամակի բովանադակությունը կապված է նախարարի պահվածքի հետ, իրենք պահանջում են դիրքորոշում հայտնել. «Մենք ոչ մեկին չենք անձնավորում, չենք ատում նախարարին, բայց թույլ չենք տա, որ նա մանիպուլյատիվ ոճով եւ արհամարհական խոսի դասախոսների հետ, քանի որ կիսահեգնական, ծաղրական ժպիտով խոսելը նախարարին վայել պահվածք չէ, մենք ոչ ուզում ենք սպանել նախարարին, ոչ էլ ատում ենք, բայց կարծում ենք, որ եթե ինքը որեւէ կոռումպացված դասախոսի գիտեր, թող դուրս հրավիրեր այդ օրը, ոչ թե ամեն ինչ ընդհանրացներ»:
Գեւորգ Գյուլումյանը հավելեց, որ 3 աշխատանքային օր հետո, երբ ստանան իրենց նամակների պատասխանները, կորոշեն, թե ինչ են անելու հետագայում: Ուսանողը նորից ընդգծեց, որ իրենք ակնկալում են դատապարտող դիրքորոշում ու հայտարարություն բուհի ռեկտորի պաշտոնակատարի եւ գիտխորհրդի կողմից:
Կարդացեք նաև
Գոհար ՀԱԿՈԲՅԱՆ
