«Հայտնի ֆիլմում ասվում է՝ «Вор должен сидеть в тюрьме»…ըստ էության, ի՞նչ է նշանակում գող՝ ավազակ, ուրիշի ունեցվածքը թաքուն հափշտակող եւ խարդախությամբ յուրացնող: Նման նշանակություն ունեցող բառով բնութագրվող որեւէ անձ չի կարող համարվել հեղինակություն»,-ԱԺ ամբիոնից այսօր «օրենքով գողերին» եւ քրեական ենթամշակույթին առնչվող աղմկոտ օրինագծի քննարկման ժամանակ ասաց «Իմ քայլը» խմբակցության պատգամավոր Անդրանիկ Քոչարյանը:
«Տարիներ շարունակ նշյալ բնորոշումը ստացվել է «քրեական հեղինակություն», «հարց լուծող», «ճշտով տղերք» հասկացությունների հետ: Պետության եւ օրենքի սահմաններից դուրս որեւէ մեկը հարց լուծել չի կարող: Այս վերջույթը սերում է դեռեւս խորհրդային տարիներից, երբ Ստալինի օրոք նման բանդաների ձեւավորումը մարդկային խմբերը կառավարելի դարձրեց: ՀՀ-ում դրանց կշիռն ավելի բարձրացավ նախկինում դրանց կողմից ընտրական գործընթացում մատուցած ծառայությունների արդյունքում»:
Հիմա, ըստ Անդրանիկ Քոչարյանի, նման բանդաները ոչ միայն հանրության շրջանում ունեն ազդեցություն, այլեւ իրենց կամքն են ուզում թելադրել քաղաքական իրադարձությունների եւ զարգացումների ուղղությամբ. «Քրեական մշակույթը տարիների ընթացքում թափանցել է նաեւ քաղաքական կառավարման դաշտ»:
Քոչարյանի խոսքով՝ նոր Հայաստանում նման երևույթներն այլեւս տեղ չունեն. «Ակնածանքի արժանի իրական հեղինակություններն առաջին հերթին պետք է կերտվեն բանակում, իրավապահ համակարգում, գիտության, մշակույթի, կրթության, սպորտի եւ այլ բնագավառներում՝ հայրենիքին անմնացորդ նվիրումի եւ օրինապաշտության համար»:
Կարդացեք նաև
Լուիզա ՍՈՒՔԻԱՍՅԱՆ
