Քիչ առաջ դատարանը վերադարձավ խորհրդակցական սենյակից և կրկին մերժեց Մանվել Գրիգորյանի պաշտպանների՝ Մանվել Գրիգորյանին 5 միլիոն ՀՀ դրամ գրավի դիմաց ազատ արձակելու վերաբերյալ միջնորդությունը։
Ինչպես արդեն տեղեկացրել ենք Երևանի ընդհանուր իրավասության դատարանի Կենտրոն և Նորք Մարաշ վարչական շրջանների նստավայրում (նախագահող դատավոր Մնացական Մարտիրոսյան) նոյեմբերի 19-ին տեղի ունեցավ ԵԿՄ վարչության նախկին նախագահ Մանվել Գրիգորյանի և նրա կնոջ՝ Նազիկ Ամիրյանի գործով դատական նիստը:
Այն ընթացավ առանց Մանվել Գրիգորյանի, քանի որ նիստի սկզբում նրա առողջական վիճակը վատացավ և նրան անվասայլակով տեղափոխեցին հիվանդանոց:
Մանվել Գրիգորյանի պաշտպան Լևոն Բաղդասարյանը միջնորդություն ներկայացրեց «Ակնալճի կուղբաբուծական տնտեսություն» ընկերության վրա դրված արգելանքը հանելու մասին: Դատարանի դահլիճում նա հայտարարեց. «Մենք այժմ ցանկանում ենք դատարանին միջնորդություն ներկայացնել հանել «Ակնալճի կուղբաբուծական տնտեսություն» ընկերության վրա դրված արգելանքը և անշարժ գույքի իրացումից ստացված դրամական միջոցներն ուղղել դատարանի կամ հարկային ծառայության ռեկվիզիտ հաշվին: Մենք իրոք ցանկանում ենք, որ արդարադատություն տեղի ունենա, և եթե կապացուցվի այս մեղքը, ցանկանում ենք, որ սա հատուցվի»:
Կարդացեք նաև
Նախագահող դատավորը մի շարք հարցեր բարձրացրեց՝ օրինակ՝ արգելանքը դրվել է ա՞յս գործի շրջանակում, կա՞ն փաստաթղթեր և այլն: Լևոն Բաղդասարյանն ասաց, որ այդ գույքը ամբաստանյալներինը չէ:
Նախագահող դատավորը որոշեց հետաձգել միջնորդության քննությունը մինչև բավարար հանգամանքների և փաստաթղթերի ներկայացումը:
Լևոն Բաղդասարյանը ներկայացրեց հաջորդ միջնորդությունը՝ միջգերատեսչական հանձնաժողովի անդամներին հրավիրել դատարան հարցաքննության: Այս միջնորդությունը մերժվեց: Նախագահող դատավորը պարզաբանեց, որ դա ոչ ժամանակին ներկայացված միջնորդություն է:
Տաթև ՀԱՐՈՒԹՅՈՒՆՅԱՆ
