Երեւանի ընդհանուր իրավասության դատարանի Շենգավիթ նստավայրում այսօր շարունակվում է «Ռոբերտ Քոչարյանի եւ մյուսների» գործով դատական նիստը:
Մարտի 1-ի զոհերից Գոռ Քլոյանի հայրը՝ Սարգիս Քլոյանը, առարկեց մեղադրող դատախազներին վարույթից հեռացնելու, պաշտպանական կողմի միջնորդության դեմ: «Մենք հիմնական պատճառը չենք ասում՝ ինչի՞ց առաջացավ Մարտի 1-ը, ո՞վ է հիմնական մեղավորը. 2008 թվականի փետրվարի 19-ի խայտառակ ընտրությունները. մեշոկներով փողեր էին բաժանում՝ իմ աչքի տեսածով…»,- ասաց Սարգիս Քլոյանը:
Նրա խոսքը կիսատ մնաց. նախագահող դատավոր Աննա Դանիբեկյանը ընդհատեց Սարգիս Քլոյանի ելույթը՝ հորդորելով դիրքորոշում հայտնել դատախազների բացարկի միջնորդության վերաբերյալ:
Սարգիս Քլոյանը շարունակեց. «Գլխավոր պատճառը՝ շատ կարճ ասեմ. Հանրապետության հրապարակից բոլոր ցուցարարները միացան Լեւոն Տեր- Պետրոսյանին: Սերժ Սարգսյանը մնաց միայնակ կանգնած՝ իր մի քանի ռաբիս երգիչների հետ: Սա այլեւս Սերժ Սարգսյանի, Ռոբերտ Քոչարյանի, Մանվել Գրիգորյանի Հայաստանը չէ, սա մեր քառօրյա պատերազմում հաղթած հերոսների Հայաստանն է, սա Մարտի 1-ին զոհված մեր երեխաների նոր Հայաստանն է, սա դատավոր Աննա Դանիբեկյանի նոր Հայաստանն է: Ես կողմ եմ, որ մեր դատախազները ավարտին հասցնեն այս գործը: Կեցցե ազատությունը, կեցցե Հայաստանը, կեցցենք մենք եւ մեր երեխաները, որ ապրել եւ ապրելու ենք ազատ եւ երջանիկ Հայաստանում: Դուխով»:
Կարդացեք նաև
Մարտի 1-ի գործով տուժողի ներկայացուցիչ Սեդա Սաֆարյանն էլ իր առարկությունը ներկայացնելով՝ ասաց. «Դուք նախորդ դատական նիստին թույլ տվեցիք, որ Ալումյանը դատարանները շրջափակելը համարի սարսափազդու մի դեպք։ Ես ուզում եմ ասել հետեւյալը. Այն, ինչը ժողովուրդն արել է դատարանների հետ կապված, շատ ավելի լավ է, քան «Չերյոմուխա» կրակելը, քաղաքի կենտրոնում փշալարեր դնելն ու զոհեր ունենալը»:
Դատարանի դահլիճում գտնվող Ռոբերտ Քոչարյանի ընդդիմախոսները ծափերով արձագանքեցին Սեդա Սաֆարյանի հայտարարությանը:
Նելլի ԳՐԻԳՈՐՅԱՆ
