«Կաշկանդվածություն չեմ ունենալու ընտրվելու դեպքում: Կարծում եմ ՝ ամեն պետական պաշտոնյա եւ քաղաքացի պետք է երազանք ունենա՝ հզոր, ուժեղ, բարեկեցիկ երկրի տեսլական, եւ գործունեության հիմքում այդ երազանքը դնի՝ ի թիվս մասնագիտական չափանիշների: Ես այդ երազանքի բարձր նշաձող եմ դրել, եւ վստահ եմ, որ առաջիկայում դրան կհասնենք»,-ԱԺ նիստում այսօր հայտարարեց ՀՀ Բարձրագույն դատական խորհրդի կողմից Կոռուպցիայի կանխարգելման հանձնաժողովի անդամի պաշտոնում առաջադրված թեկնածու Արամայիս Փաշինյանը՝ արձագանքելով պատգամավոր Արման Բաբաջանյանի դիտարկմանը, որ ԲԴԽ-ն հանրության շրջանում վստահություն չի վայելում:
Արման Բաբաջանյանը նկատեց. «Դուք շատ լավատես եք, պարոն Փաշինյան: Նրանք, ովքեր հարստահարում եւ կեղեքում էին երկիրը, երազանքի անունից էին նաեւ հանդես գալիս եւ այդ ամենը որպես մեծ հերոսություն փաթեթավորում: Ուզում եմ գիտակցեք, թե ուր եք գնում եւ ինչ «ակուլաների» հետ եք գործ ունենալու, որովհետեւ նրանք, ովքեր կարող են իրենց թույլ տալ ներկայումս կոռուպցիա…այսօր համակարգային կոռուպցիա չունենք, բայց եթե աչքներս թարթենք, հասկանալի է, որ այն պաշտոնյաները, որոնք կարոտում եւ երազում են նախկին ժամանակները, շատ արագ ընթացքը կարող են այդ հունով տանել: Սա որպես ռեպլիկ, ավելին չեմ ասի»:
Արամայիս Փաշինյանը պատասխանեց. «Խորապես գիտակցում եմ եւ այդ գիտակցմամբ եմ ընդունել ԲԴԽ առաջարկը: Գիտակցում եմ պատասխանատվությունը եւ պատրաստ եմ մտնել պայքարի մեջ»:
Լուիզա ՍՈՒՔԻԱՍՅԱՆ
