Ինչպես ավելի վաղ հայտնել էինք, ԱԺ «Բարգավաճ Հայաստան» խմբակցությունը Կոռուպցիայի կանխարգելման հանձնաժողովի անդամի պաշտոնում առաջադրել է Քննչական կոմիտեի աշխատակից Նարեկ Համբարձումյանի թեկնածությունը: ԱԺ-ն այսօրվա նիստում քննարկում է նրա թեկնածության հարցը:
Արման Բաբաջանյանը նրանից հետաքրքրվեց՝ ինչպե՞ս կվարվի, թե հանձնաժողովը քննելիս լինի Նիկոլ Փաշինյանին, Արարատ Միրզոյանին, Էդմոն Մարուքյանին կամ Գագիկ Ծառուկյանին, կամ էլ՝ Բարձրագույն դատական խորհրդի նախագահ Ռուբեն Վարդազարյանին վերաբերող հարցեր:
«Եվ ի՞նչ երաշխիքներ եք տեսնում, որ հանձնաժողովի անդամները զերծ կմնան քաղաքական եւ նեղ անձնական շահերից եւ կաշկանդված չեն լինի այդ պարագայում»,-հարցրեց Բաբաջանյանը:
Կարդացեք նաև
Նարեկ Համբարձումյանը պատասխանեց. «Իմ աշխատանքը միշտ պահանջել է լինել օբյեկտիվ: Ինձ համար կարեւոր է օրենքի առաջ բոլորի հավասարության սկզբունքը: Ինձ համար նշանակություն չեն կարող ունենալ անձանց անունները, այդ թվում՝ բարձրաստիճան պաշտոնյաների: Կատարել եւ կատարելու եմ միայն օրենքի պահանջը՝ լինել օբյեկտիվ եւ անաչառ: Ես ապաքաղաքական եմ եւ այդպիսին կլինեմ»:
Լուիզա ՍՈՒՔԻԱՍՅԱՆ
