Ինչպես ավելի վաղ հայտնել էինք, ԱԺ այսօրվա նիստում քննարկվում է Կոռուպցիայի կանխարգելման հանձնաժողովի անդամի պաշտոնում կառավարության կողմից առաջադրված Լիլիթ Ալեքսանյանի թեկնածության հարցը: «Իմ քայլի» պատգամավոր Հայկ Գեւորգյանը նրանից հետաքրքրվեց՝ ի՞նչ մեխանիզմներ կարող է առաջարկել երկրից ապօրինի կերպով դուրսբերված եւ օֆշորային գոտիներում հանգրվանած գումարների վերադարձի ուղղությամբ:
Լիլիթ Ալեքսանյանը պատասխանեց. «Ինչպես նշեցիք, այդ գումարներն օֆշոր են գնում, եւ այդտեղ գուցե հանձնաժողովի լիազորությունները սահմանափակ լինեն: Ավելի խորն ուսումնասիրություններ են պետք միջազգային փորձի: Գործիքակազմ առաջարկելուց այս պահին զերծ կմնամ, բայց վստահ եմ, որ առաջարկներով հանդես գալու դեպքում հանձնաժողովում կքննարկենք եւ կհանգենք որոշակի լուծումների»:
«Իմ քայլի» պատգամավոր Թագուհի Թովմասյանն էլ նկատեց՝ ելույթում Լիլիթ Ալեքսանյանը նշել էր, որ պաշտոնյաներին տրվող նվերները եւս պետք է վերահսկել. ի՞նչ մեխանիզմ կառաջարկի դրա համար: Լիլիթ Ալեքսանյանը նշեց. «Այնպես չէ, որ պաշտոնյաներին կարիք կա նվեր տալու: Քաղաքացին պետք է գիտակցի, որ պաշտոնյան արդեն իսկ վարձատրվում է իր աշխատանքի համար: Քաղաքացիների կողմից պաշտոնյաներին նվերներ փոխանցելը հնարավոր է կանխել: Պաշտոնյան նվեր ստանալիս կարող է ասել՝ «օրենքը սահմանում է, որ ես չեմ կարող նվերը հենց այսպես ընդունել եւ հետագայում կասեմ՝ հնարավո՞ր է այն ընդունել, թե ոչ»: Անսովոր է, բայց հնարավոր է նման մշակույթ ձեւավորել քաղաքացիների շրջանում»:
Կարդացեք նաև
Լուիզա ՍՈՒՔԻԱՍՅԱՆ
