Այսօր «Իրազեկ քաղաքացիների միավորումը» «Սահմանադրական դատարանի շուրջ ստեղծված իրավիճակը եւ լեգիտիմության խնդիրները» թեմայով հանրային քննարկում էր կազմակերպել:
«Հելսինկյան քաղաքացիական ասամբլեայի Վանաձորի գրասենյակի» ղեկավար Արթուր Սաքունցն ասաց, որ ՍԴ-ի հարցում մի ելակետ կա՝ տեղի՞ է ունեցել հեղափոխություն, թե՞ ոչ. «Եթե իշխանափոխություն է լինում, տրամաբանական է, թե ինչո՞ւ պետք է մյուս ինստիտուտները չշարունակեն գործել: Բայց եթե մենք ելնում ենք այն սկզբունքից, որ տեղի է ունեցել հեղափոխություն, ապա այդ դեպքում անխուսափելիորեն հարց է առաջանում՝ բա ինչո՞ւ տեղի ունեցավ դա»: Ըստ Սաքունցի, պետական մարմինների լեգիտիմության կարեւոր երաշխիք է Սահմանադրության լեգիտիմությունը. «Իհարկե, թղթի վրա ամեն ինչ ճիշտ է տարբերակը մեզ չգոհացրեց»: Սաքունցն օրինակներ բերեց ՍԴ-ի կայացրած քաղաքական որոշումներից ու վստահեցրեց, որ ՍԴ-ի նկատմամբ վերաբերմունքն էլ քաղաքական պայմանավորվածության համատեքստում է:
Սաքունցը ՍԴ-ի շուրջ ստեղծված իրավիճակի համար իր լուծումն ունի՝ Սահմանադրական հանրաքվե անցկացնել այս հարցով՝ ՍԴ-ն ցրել՝ օրենքի ուժով ու նորից հավաքել:
ՍԴ անդամ Ալվինա Գյուլումյանը հայտարարեց. «Ինչ վերաբերում է քաղաքական պայմանավորվածություններին, ես ձեզ ընդամենը մի հարց տամ՝ ՍԴ դատավորի վերջին ընտրությունները քաղաքական պայմանավորվածությունների արդյո՞ւնք էր, թե՞ ոչ»: Սաքունցը հաստատեց՝ այո, քաղաքական պայմանավորվածության արդյունք էր:
Կարդացեք նաև
Ալվինա Գյուլումյանն ասաց, որ եթե կոնկրետ Հրայր Թովմասյանն է հարցը, սա ուրիշ հարց է, բայց որեւէ արգելք օրենսդրությամբ չկա, որ նախկին կուսակցության անդամը չի կարող լինել ՍԴ դատավոր. «Բոլորիս աչքի առաջ է, որ այսօրվա ԱԺ-ում եղան երկու թեկնածուներ, որոնք որեւէ կուսակցության անդամ չէին եղել, որպես մասնագետ համապատասխանում էին չափանիշներին, բայց չընտրվեցին ԱԺ-ի կողմից, ընտրվեց մեկը, որը ցանկալի էր քաղաքական ուժի համար: Սրանք գործընթացներ են, որոնց դեմ ես ոչինչ չունեմ: Քաղաքական գործընթացներ են: Նրանք ընտրվում են ՍԴ դատավոր, ես պարտավոր եմ համագործակցելու, նրանց հետ աշխատելու: Իմ լիազորություններն այդտեղ ավարտվում են: Այն, ինչ կարող են անել ՍԴ դատավորներն իրենց գործընկերների հետ, դա կարգապահական վարույթի հարուցումն է»:
Սաքունցն արձագանքեց, որ խնդիրը մեկ անձը չի, կա աճպարարություն ու դա ակնհայտ է:
Հռիփսիմե ՋԵԲԵՋՅԱՆ
