«Մենք պարբերաբար մի խումբ պատգամավորներով, ում հետաքրքրում է Ամուլսարի հարցը, հանդիպում ենք ե՛ւ կառավարության հետ՝ հասկանալու գործողությունները եւ ընթացքը, ե՛ւ մարդկանց, հանրային ու բնապահպանական կազմակերպությունների հետ, հանդիպում ենք նաեւ բնակիչների հետ՝ Ջերմուկ, Գնդեվազ, հասկանալու նրանց մոտիվացիան ու գործողությունները: Տեսնում ենք, որ հաղորդակցության որոշակի խնդիրներ կան, եւ մարդիկ պետք է իրար ավելի շատ լսեն եւ ավելի լավ հասկանան դիրքորոշումները, հիմա մենք մեզ վրա ենք վերցրել այդ հաղորդակցությունը ստեղծելու գործառույթը»,-այսօր ԱԺ-ում լրագրողների հետ զրույցում ասաց «Իմ քայլը» խմբակցության պատգամավոր Վարազդատ Կարապետյանը:
Նա ասաց, որ իրենք հանդիպումներ են ունենում բնակիչների ու ՀԿ-ների հետ՝ հասկանալու ե՛ւ կառավարության ծրագրերը, ե՛ւ մարդկանց դիրքորոշումները, որպեսզի կարողանան ի մի բերել դրանք ու մեկ տեսակետ ունենալ, գնալ իրավական ճանապարհով:
Հարցին՝ ի վերջո ի՞նչ փուլում է Ամուլսարի շահագործման հարցը, Վարազդատ Կարապետյանը պատասխանեց. «Հիմա գործընթաց կա, եւ այդ գործընթացը պետք է թողնենք գնա առաջ, որպեսզի մենք հասկանանք, թե այս հարցի իրավական լուծումները որոնք են: Այս պահի դրությամբ գործընթաց կա, որը կառավարության դաշտում է, եւ այս բոլոր հարցերի պատասխանն ավելի շատ կառավարությունը կտա»:
Խոսելով 2020 թվականի պետական բյուջեի նախագծի շուրջ քննադատություններից, որ այն հեղափոխական բյուջե չէ, Վարազդատ Կարապետյանն ասաց, որ մի շարք ոլորտներում՝ կրթության, մասնավորապես դպրոցաշինության մեջ, ռոբոտաշինության ծրագրի մասով, առողջապահությունում հնարավոր է իրականացնել տարբեր ծրագրեր. «Իհարկե, պետք է հաշվի առնենք, որ բյուջեն անսահմանափակ չէ, եւ հնարավոր չէ ամեն ինչ միանգամից անել, մեզ անհրաժեշտ է որոշակի ժամանակահատված, օրինակ՝ ճանապարհաշինության մեջ ակնհայտ առաջընթաց կա եւ մյուս տարվա մի քանի անգամ ավելի գումարի պլանավորումը, ոռոգման ջրագծերի վերանորոգման եւ համակարգի թարմացման հետ կապված ավելի շատ գումար է նախատեսված: Այսինքն՝ կառավարությունը սահմանել է որոշակի գերակայություններ, եւ այդ գերակայություններն ակնհայտ իրենց արտացոլումը գտել են մեր բյուջեի մեջ»:
Հարցին՝ հնարավո՞ր է բյուջեի այս նախագծով իրականացնել տնտեսական հեղափոխություն, Վարազդատ Կարապետյանը պատասխանեց, որ կառավարությունն ու ԱԺ-ն պարտավոր են ապահովել միջավայր, սակայն գործողությունների պատասխանատուն ժողովուրդն է. «Եթե ժողովուրդն իր պատասխանատվությունը չվերցրեց, նշանակում է իր ուժը չի գիտակցում»:
Հռիփսիմե ՋԵԲԵՋՅԱՆ
Կարդացեք նաև
