«Եթե ես երկու բառով բնութագրեի կառավարության սկզբունքները տնտեսական քաղաքականության իրականացման հարցում, կասեի՝ ներառականություն եւ մասնակցայնություն»,-2020թ.-ի պետբյուջեի նախագծի քննարկման ժամանակ այսօր ԱԺ նիստում հայտարարեց խորհրդարանի նախագահ Արարատ Միրզոյանը: Նրա խոսքով՝ կոռուպցիայի եւ թալանի պատճառով քաղաքացին նախկինում իրեն չէր զգում երկրի սեփականատեր, եւ չէր էլ գիտակցում հարկերի վճարման կարեւորությունը եւ արդյունքը: «Հիմա իսկապես ժամանակն է ոչ թե մեկնաբանություններ անելու, այլ թողնելու, որ թվերը խոսեն»,-նկատեց Միրզոյանը:
Նա շեշտեց, որ 2020թ.-ի բյուջեի նախագծում կանխատեսված է եկամտային մասի աճ. «Նախահեղափոխական շրջանի համեմատությամբ՝ եկամուտների մասով, որում առյուծի բաժինը հարկերն ու տուրքերն են, 500 միլիարդ դրամի տարբերություն ունենք: Ի՞նչ է սա, եթե ոչ վկայություն այն բանի, որ քաղաքացին հավատում է պետությանը, մասնակցում տնտեսությանը, հավատում եւ մասնակցում տնտեսական աճին: Բայց սա սահմանը չէ, ավելացնելու տեղ կա»: Միրզոյանը կարծում է, որ կառավարությունը պետք է ավելացնի սոցիալական ծախսերը, որպեսզի քաղաքացին շոշափի իր հարկերի արդյունքը, եւ երկարաժամկետ ներդրումները՝ առաջնահերթ ենթակառուցվածքների զարգացման ուղղությամբ: «Մեր գնացքը ճիշտ ուղղությամբ է գնում, թվերը վկայում են այս մասին»,-եզրափակեց Արարատ Միրզոյանը:
Լուիզա ՍՈՒՔԻԱՍՅԱՆ
Կարդացեք նաև
