«Մանվել Գրիգորյանի դեմ քրգործով նիստը նախագահող դատավորը, մեծ ջանքեր գործադրելով, պահպանում է իր առջև դրված խնդիրը՝ Գրիգորյանին կալանքի տակ պահելը: Գրիգորյանի դեմ հարուցված քրեական գործով արդարադատություն կոչվածն իսպառ բացակայում է»,- այսօր «Հենարան» ակումբում լրագրողների հետ հանդիպման ժամանակ հայտարարեց կալանքի տակ գտնվող ԵԿՄ նախկին նախագահ, գեներալ Մանվել Գրիգորյանի պաշտպան Լեւոն Բաղդասարյանը:
Պաշտպանն արդեն որերորդ անգամ ահազանգում է այս գործով անօրինականությունների մասին: Թեեւ իր պաշտպանյալը շատ երկար ժամանակ՝ առողջական վիճակից ելնելով, չէր կարողանում մասնակցել դատական նիստերին, պաշտպանը նկատում է, որ դատարանը, օգտվելով դրանից, քրգործի կարևոր մասերով որոշումներ էր կայացնում:
Վերջին նիստին Մանվել Գրիգորյանը մասնակցում էր: Ըստ Լեւոն Բաղդասարյանի՝ դրանից հետո երկու օր է պահանջվել, որպեսզի նրա վիճակը վերականգնվի, եւ դեռ պարզ չէ՝ կկարողանա՞ Մանվել Գրիգորյանը մասնակցել նոյեմբերի 19-ին նախատեսված նիստին:
Լրագրողներից մեկի հարցին՝ ի՞նչ ակնկալիքներ ունի պաշտպանը դատաքննության հետագա ընթացքից, Լեւոն Բաղդասարյանը պատասխանեց, որ նախ ՀՀ վարչապետը պարտավոր է բարձրաձայնել՝ անհրաժեշտ է այս գործով օբյեկտիվ քննություն գնա. «Գրիգորյանի գործով կաշկանդվածություն կա. վարչապետը ինչ հայտարարություն արել է, եղել է գործի քննության համար ոչ բարենպաստ: Այդ հայտարարությունները դատարաններին ու դատավորին կաշկանդել են»:
Կարդացեք նաև
Հիշեցնենք, որ դեռ 2018-ի հունիսի 17-ին, խոսելով այս գործի մասին, վարչապետ Նիկոլ Փաշինյանն ասել էր՝ այո, Մանվել Գրիգորյանը Արցախի հերոս է, ոչ մեկը դա չի ժխտում, բայց նույնիսկ հերոսներին իրավունք չի տրված տարբեր մարզերի դպրոցականների` զինվորներին ուղարկված օգնությունը գողանալ և կերակրել սեփական կենդանիներին։
Հիշեցնենք, նաեւ, որ Մանվել Գրիգորյանը մեղադրվում է ապօրինի զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակություն կազմակերպելու մեջ: Նրան մեղադրանք է առաջադրվել 2018թ.–ի հունիսի 19-ին։
Նելլի ԳՐԻԳՈՐՅԱՆ
