Այն, ինչ տեղի է ունենում այս օրերին Հայաստանում, մեծ հաշվով՝ երկու տարբեր արժեհամակարգերի բախման արդյունք է։ Առաջին հայացքից կարող է թվալ, թե բախվում են «հինն ու ավանդականը» եւ «նորն ու ժամանակակիցը», բայց իրականում ամեն ինչ ավելի բարդ է։ Իշխանությունների դեմ մոբիլիզացվում են բոլոր ռեսուրսները, եւ արդյունքում ստեղծվել է բավականին տարօրինակ իրավիճակ՝ հայոց լեզվի ու պատմության, հայ եկեղեցու, ավանդական արժեքների պահպանման համար պայքարողներն ու կրիմինալ ենթամշակույթն աստվածացնողները («ճշտի նվիրյալները») խրամատի նույն կողմում են՝ ընդդեմ իշխանությունների։
Հասկանալի է, որ դասադուլ անող ուսանողներն ու օրենքով գողերի համար «դոշ տվողները» մարդու տարբեր տեսակներ են, բայց երկու դեպքում էլ պայքարը «հանուն ավանդական արժեքների» է՝ ընդդեմ «դրսից ներմուծվող ապազգային նորարարությունների»։ Ու արդյունքում ձեւավորվում է «ավանդապաշտ հայի» հավաքական կերպար՝ հայոց լեզուն, հայ գրականությունն ու հայոց պատմությունն անսահմանորեն սիրող (բայց լավ չիմացող, որովհետև սովորելն ու գիրք կարդալը «զապադլո ա»), Կոմիտասով հպարտացող, բայց Վլե ու Արմենչիկ լսող, խիստ բարեպաշտ (ավտոների «պադբրիսներից» մի քանի խաչ կախած ու եկեղեցիների մոտով անցնելիս անպայման խաչակնքող), բայց հանցագործ աշխարհը հարգող, ցանկացած հարց «հայավարի» (մաղարիչով- բանով) լուծելու կողմնակից ու «փողը մութ տեղը լուս ա տալի» ասացվածքը վերին ճշմարտություն համարող, մայրերին ու քույրերին աստվածացնող, օջախը սրբություն համարող, բայց «կնգա ասածը ասնավանի չի» սկզբունքով ապրող…
«Հանուն ժամանակակից արժեքների» պայքարողների հավաքական կերպարը նույնպես աչք չի շոյում։ Անպայման ահավոր նեղ տաբատներով, տարօրինակ սանրվածքներով, համակարգչի եւ առնվազն մի օտար լեզվի փայլուն իմացությամբ (եւ հայերեն խոսելիս անպայման դա ցուցադրող), ֆեյսբուքում՝ եվրոպական մի քանի մայրաքաղաքներում արված լուսանկարներով, հելոուին նշող ու կնունքը «փարթի» անվանող, սեռական փոքրամասնությունների, անօթեւան կենդանիների ու Կարմիր գրքում հայտնված բուսատեսակների իրավունքներն ինքնամոռաց պաշտպանող, ցանկացած արժեք բացառապես «լայքերի» թվով գնահատող…
Իրականում բաժանումն այդպիսին չէ, բայց խնդիրը հենց այն է, որ այդպե՛ս է ներկայացվում:
Կարդացեք նաև
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
