Գյումրու «Սև Բերդ» ամրոցի մոտակայքում գտնվող «Մայր Հայաստան» հուշահամալիրը, որն հանդիսավոր կերպով բացվել է 1975 թվականի մայիսի 9-ին՝ Հայրենական Մեծ պատերազմին մասնակցած գյումրեցիների հիշատակը հավերժացնելու նպատակով, վերանորոգվում է։ Այն պատրաստ կլինի մայիսի 9-ին։
Այս մասին վերջին ավագանու նիստում հայտարարեց Գյումրու քաղաքապետ Սամվել Բալասանյանը՝ ավագանու անդամ Արտակ Ադամյանին, որի հայրը «Մերձմոսկովյան» ԲԲԸ-ի ղեկավարն է, հորդորելով գործ անել այնտեղ։
Նշենք, որ Ղարս խճուղու հարևանությամբ գտնվող «Մայր Հայաստան» հուշահամալիրում սանդղաջրվեժի վերանորոգման և տարածքի բարեկարգման շինաշխատանքներ իրականացնելու մրցույթը շահել է «Մերձմոսկովյան» ԲԲԸ-ն՝ 51․132 միլիոն դրամով։ Վերանորոգման աշխատանքներն իրականացվում են Գյումրու քաղաքապետարան-ՀՀ կառավարություն համատեղ ծրագրի շրջանակներում։
«Նախագծերը կան, ամեն ինչը կա, խոստանանք, որ մայիսի 9-ին պիտի բացենք։ Նույնիսկ ձմեռը պիտի գործ անեք, բերեք իդեալական տեսքի։ Շատ հետաքրքիր միջավայր կստացվի, որովհետև շատ լավ նախագիծ է, եթե նույնիսկ նախագծում ավելացնելու բան կա, մենք պատրաստակամ ենք, հիմա նամակ ենք նախապատրաստում, հանձնարարել եմ, եթե կարող ենք 10 տոկոսով ծավալ ավելացնել, կավելացնենք, մենք պատրաստակամ ենք։
Կարդացեք նաև
Կարգի բերենք, գեղեցկացնենք, լուսավորենք, և ունենանք «Մայր Հայաստան» համալիր, որտեղ մարդիկ կարողանան գնալ, զբոսնել, գեղեցիկ միջավայր ստեղծենք, լիճը նույնպես կարգի կբերենք, ծառատունկ ենք անելու, կունենանք մի հրաշք միջավայր»,-ասաց քաղաքապետը։
Նա մի շատ կարևոր տեղեկություն հայտնեց՝ աչքալուսանք տալով, որ վերջապես կկարողանան Գյումրու փողոցներից դուրս բերել ծանր տեխնիկան։
Սամվել Բալասանյանն ասաց․ «Շրջանցող ճանապարհը բացեցինք, բոլորիս աչքը լույս լինի, արդեն բացվեց, թեև պաշտոնական բացումը չենք արել, բայց մի հրաշք ճանապարհ է եղել, որը կապում է Բուլվարային թաղամասը Տեր-Գաբրիելյան փողոցի (այն «Մայր Հայաստանին» հարակից փողոց է Ա․Ն․) խաչմերուկի հետ, սա երևի թե մեր քաղաքի ամենամեծ հաջողություններից մեկն է:
Կկարողանանք ծանր տեխնիկան մեր քաղաքից դուրս բերելի (ի նկատի ունի Վրաստանից Հայաստան մտնող բեռնատար մեքենաները Ա․Ն․), որովհետև Բավրայից ուղիղ գալիս են Շիրակացի փողոցով (սա Գյումրու կենտրոնական փողոցներից մեկն է Ա․Ն․), միայն հրապարակն են շրջանցում, իսկ հիմա կկարողանանք միանգամից Մարմաշենից բերել մինչև Ղարիբջանյան խճուղի: Պատկերացրեք, 3,5 կիլոմետր շատ լավ ճանապարհ է ստացվել, այդ ճանապարհը սուբվենցիոն ծրագրով է սարքվել»։
Նունե ԱՐԵՎՇԱՏՅԱՆ
