«300 միլիարդ դրամ բանկային համակարգում գտնվում են սառեցված վիճակում, 150-ի դեպքում ֆորմալ դատական վեճեր կան. այսինքն, մարդն ընդունում է, որ պետք է վճարի այդ գումարը, բայց իրավական գործընթաց պետք է անցնի, իսկ դա տարիներ կարող է տեւել, քանի որ դատարանները գերծանրաբեռնված են: Ստացվում է՝ գումարը կա, ներդրողը կա, բայց հնարավոր չէ գումարը ներդնել տնտեսության մեջ»,- այսօր Հայաստանում ամերիկյան առեւտրի պալատի տարեկան ժողովի ժամանակ ասաց վարչապետ Նիկոլ Փաշինյանը՝ պատասխանելով ներդրումների նվազման մասին հարցին:
Վարչապետն ասում է՝ դատական համակարգը չի կարողանում պատշաճ սպասարկել տնտեսությանը, ներդրումային վեճերի հետ կապված խնդիրներ կան: Օրինակ, ըստ նրա, Երեւանի կենտրոնում այս պահին կամ մի քանի հարյուր միլիոնի ներդրումային ծրագրեր, որոնք կանգնած են, հարեւանի կամ ինչ-որ մեկի հետ դատական վեճի արդյունքում:
«Դա կապված է դատաիրավական բարեփոխումների հարցի հետ, իսկ դա այն ոլորտն է, որտեղ արագ գործընթացները հնարավոր չեն, անգամ անթույլատրելի են»,- ասաց Նիկոլ Փաշինյանը: Այս եզրակացությանը կառավարությունում հանգել են՝ միջազգային փորձն ուսումնասիրելով:
«Այս առումով, հնարավոր է նույնիսկ ներդրումային վիճակը վատացել է, քանի որ նախկինում քաղաքական իշխանությունը որոշում էր՝ ով է հաղթում, ով պարտվում, դատարանը որոշումը կայացնում էր: Հիմա, մեզ այդ նույն խնդրով դիմում են անընդհատ, բայց մենք ասում ենք, որ այդպես չենք կարող աշխատել»,- ասաց Նիկոլ Փաշինյանը:
Կարդացեք նաև
Նելլի ԳՐԻԳՈՐՅԱՆ
