«Իմ քայլական» պատգամավորները նախագիծ էին մշակել, որով ուզում էին ԱԺ նախագահին իրավունք տալ մասնակցելու Անվտանգության խորհրդի նիստերին ու առաջարկ ներկայացնել, սակայն կառավարությունը դեմ էր, ու նախագիծը տապալվեց:
Այսօր լրագրողների հետ ճեպազրույցում Արարատ Միրզոյանն ասաց, որ ջանք չեն թափել, որպեսզի քվե ապահովեն, անհրաժեշտ ձայներ լինեն. «Եթե ցանկանանք, կարող ենք նորից շրջանառել: Եթե այնպես լիներ, որ ուզենայինք ամեն գնով ընդունել, մենք կարող էինք գործուղում մեկնող գործընկերներին խնդրել նամակով տեղեկացնել իրենց «կողմ» քվեարկության մասին, ունեինք նաեւ բացականեր, կարող էինք հորդորել, որ չբացակայեն»:
Հարցին՝ այդ դեպքում ինչո՞ւ քվեարկությունից հետո ձեր աշխատասենյակում քննարկում կազմակերպեցիք ձեր խմբակցության քարտուղարի, Սիփան Փաշինյանի մասնակցությամբ, Արարատ Միրզոյանը պատասխանեց. «Իմ աշխատասենյակում պարբերաբար պատգամավորներ լինում են, անկեղծ ասած, գրեթե մենակ չեմ լինում, անընդհատ շատ տարբեր պատգամավորների հետ քննարկում եմ ունենում, այստեղ ֆորսմաժոր չկա, ժողովուրդ ջան: Ապրենք՝ կտեսնենք»:
Հարցին՝ ձեզ համար կարծես անսպասելի էր, որ օրինագիծը տապալվեց, ինչո՞ւ, Արարատ Միրզոյանը պատասխանեց. «Էն առումով էր անսպասելի, որովհետեւ ինձ թվում էր՝ սա այն նախագիծն է, որին բոլորը կողմ կլինեն, ոչ միայն իմ քայլականները: Վստահեցնում եմ, չեմ ձեւացնում, իսկապես, մեծ խնդիր չեմ տեսնում այստեղ: Կլինի անհրաժեշտություն քննարկել՝ կքննարկենք, նորից կառաջարկեն այս կամ այն մոտեցումը: Մենք ջանք չենք գործադրել, որ ասենք՝ վայ, այսպիսի օրենք է պետք, պետք է անպայման գալ: Հերթական օրենքի նախագիծն է, որը մարդիկ լսել են հիմնական զեկուցողի շուրթերից, հնարավորություն են ունեցել հանձնաժողովում քննարկել, վերջում որոշել են ոնց քվեարկել»:
Կարդացեք նաև
Հռիփսիմե ՋԵԲԵՋՅԱՆ
