«Սատանա կա՞ քաղաքում, չկա՞, սատանիստական ի՞նչ կա-չկա, սատանայի հետ կապ ունեցող անձինք կա՞ն, թե՞ ոչ»՝ պարզելու ու բացահայտելու համար վարչապետ Նիկոլ Փաշինյանը հանձարարություն է տվել ազգային անվտանգության ծառայությանը: Իր հանձարարության հավաստիացման համար այսօր կառավարության նիստում Փաշինյանը դիմեց ԱԱԾ տնօրենի պաշտոնակատարին. «Առանց կատակի: Պարոն Մարտիրոսյան, ես նման հանձնարարություն տվել եմ, չէ՞, պարզելու որոշ շրջանակների եւ սատանայի համագործակցության ձեւերն ու ուղիները։ Ծիծաղում եք, բայց եթե կա խնդիր, դա պետք է պարզվի, դա ազգային անվտանգության խնդիր է։ Պարոն Մարտիրոսյան, հաստատեք, որ այդպիսի հանձնարարական ստացել եք»:
ԱԱԾ տնօրենի պաշտոնակատար Էդուարդ Մարտիրոսյանն էլ հաստատեց, որ իրոք մի քանի օր առաջ նման հանձնարարական է ստացել վարչապետից եւ խոստացավ զեկուցել ամենը:
Փաշինյանն էլ ասսաց. «Ովքեր այդ մասին տեղեկություններ ունեն, կոչ եմ անում ԱԱԾ-ին դիմել»: Փաշինյանը նաեւ նշեց՝ այս թեման հումորով ընկալվեց, բայց ամենայն լրջությամբ է այդ հանձնարարությունը տրված. «Եթե կան մտահոգություններ հանրության շրջանում, պետք է հասկանալ՝ այդպիսի թեմա գոյություն ունի, թե՞ ոչ, ինչքանո՞վ է լուրջ այդ թեման, ինչքանո՞վ կան տոտալիտար գաղափարախոսություններ, որոնցով կարող է փորձ արվել, այդ թվում՝ նաեւ պետական ռեսուրսներ օգտագործելով տարածել եւ այլն: Հանրությունը պետք է իմանա, որ կառավարությունը ոչ մի ահազանգ ուղղակի անհետեւանք չի թողնելու։ Այո, գնանք նայենք, եթե կա այդպիսի խնդիր, արձանագրենք այդ խնդիրը, իրեն տանք պարամետր, ձեւակերպում, որպեսզի նաեւ մեր նախարարությունները, մշակութային օջախները, հանրությունը հնարավոր առնչություն ունենան, իրենք իմանան դա ինչ է։ Եթե խոսքը թմրանյութի մասին է, թմրանյութը կարողանում ենք ձեւակերպել ինչ է, զենք-զինամթերը գիտենք, բայց եթե կա այդպիսի խնդիր, որի մասին խոսում են մեր սիրելի որոշ հայրենակիցներ, ուրեմն դա էլ պետք է հասկանանք։ Եթե կա այդպիսի խնդիր, պետք է մոտեցում ցուցաբերենք զուտ ազգային անվտանգության տեսանկյունից»:
Նելլի ԲԱԲԱՅԱՆ
Կարդացեք նաև
