ՀՀ կառավարության շենքի առաջ շարունակվում է երիտասարդների ցույցը ` ԿԳՄՍ նախարար Արայիկ Հարությունյանի հրաժարականի պահանջով: Նրանք կառավարության շենքի առաջ խորհրդանշական նախարարական աթոռ են դրել:
«Ժողովրդային շարժումով եկած այս իշխանությունները բազմիցս հայտարարել են, որ կառչած չեն աթոռներից եւ պատրաստ են հեռանալ ժողովրդի պահանջի դեպքում, Արայիկ Հարությունյանն օրեր առաջ տված իր հարցազրույցում ասաց, որ հրաժարական կտա միայն այն դեպքում, երբ ինքը համարի, որ իր գործառույթները բավարար չի իրականացնում: Արայի՛կ Հարությունյան, դուք մոռացել եք, թե ձեզ ով է բերել իշխանության եւ մոռացել եք, թե ով կարող է հեռացնել իշխանությունից»,-բարձրախոսով հայտարարեց ցույցը ղեկավարող երիտասարդներից մեկը, ինչն ուղեկցվեց ծափահարություններով:
«Ձեր հրաժարականի պահանջն այլեւս համաժողովրդական է, եւ դուք պետք է զիջեք նախարարի աթոռը: Պարոն Արայիկ Հարությունյան, դուք ստում էիք, երբ ասում էիք, թե կառչած չեք աթոռներից, դուք կառչած եք ձեր աթոռից»,-ասաց երիտասարդը:
ՀՅԴ Հայաստանի Երիտասարդական միության անդամ Քրիստինե Վարդանյանը նշեց, որ իրենց բերած աթոռը մնալու է կառավարության շենքի առաջ, քանի որ այն խորհրդանշում է Արայիկ Հարությունյանի` աթոռից կառչած լինելը: Ցուցարար ուսանողները կոչ արեցին իրենց շարժումը չսեւացնել եւ չկապել կոռուպցիայի հետ:
Կարդացեք նաև
Գոհար ՀԱԿՈԲՅԱՆ
