«Ի՞նչ նորարարական ծրագրեր եք նախատեսում զբոսաշրջության համար: Հայաստան եկողներին ի՞նչ նոր բաներ կարող ենք ցույց տալ: Եկեղեցիներից բացի, տուրիստներին այլ բան ցույց տալո՞ւ ենք»,-2020թ.-ի պետբյուջեի նախագծի քննարկման ժամանակ այսօր ԱԺ-ում Էկոնոմիկայի նախարար Տիգրան Խաչատրյանին այսպիսի հարց հղեց «Իմ քայլի» պատգամավոր Հովհաննես Հովհաննիսյանը: Նրա խոսքով՝ զբոսաշրջային վայրերի կողմնորոշիչ գրառումներ եւ բավարար ճանապարհային նշաններ չկան, արդիական է նաեւ պետքարանների հարցը:
Նախարարը պատասխանեց, որ ենթակառուցվածքների հարցն իրենց համար առաջնահերթ է լինելու. «Ավելի հաճախ զբոսաշրջիկները մատնանշում են ճանապարհների ոչ բավարար վիճակը: Առաջիկայում ներդրումների հիմնական մասն ուղղված կլինի այդ խնդրին: Իսկ ճանապարհային նշանները դրա հետ կապված են»: Ինչ վերաբերում է նորարար ծրագրերին, Տիգրան Խաչատրյանը տեղեկացրեց, որ գաստրոտուրիզմի եւ գինեգործության ուղղություններն արդեն իսկ նպաստել են զբոսաշրջիկների թվի աճին, բայց մասնավոր հատվածն ինքն է նախաձեռնում դրանք:
Ըստ նախարարի՝ ճկուն օրակարգով են աշխատելու եւ պատրաստ են լինելու քննարկել ցանկացած նորարար գաղափար: Հովհաննես Հովհաննիսյանը պատասխանեց, որ նորարար գաղափարներ ունի եւ ասաց, որ Արաբական միացյալ էմիրություններում, օրինակ, «Ալլադին» հեքիաթի քաղաք են կառուցում, իսկ ՀՀ-ում իրական ավանդույթներից չեն կարողանում եկամուտ ունենալ:
Լուիզա ՍՈՒՔԻԱՍՅԱՆ
Կարդացեք նաև
