«Պետք է պարզել վիճակագրությունը՝ այն ժամանակ, երբ ՀՀ-ում կոռուպցիան աննախադեպ ծավալով աճում էր, այդ նույն մարդիկ քանի՞ հոգու հրաժարական են պահանջել: Սա կարեւոր կլինի»,-ԱԺ-կառավարություն հարցուպատասխանի ժամանակ այսօր անդրադառնալով ԿԳՄՍ նախարար Արայիկ Հարությունյանի հրաժարականը պահանջող ՀՅԴ երիտասարդների բողոքի նստացույցին՝ ասաց վարչապետ Նիկոլ Փաշինյանը: Ինչ վերաբերում է կարծիքներին, թե նախարարը հովանավորում է սատանիզմը, եւ «Հուզանք ու զանգ» ներկայացումը սատանիստական է, Փաշինյանը նշեց. «Համապատասխան մարմիններից տեղեկանք եմ ուզում՝ ներկայացրեք, թե ինչ է սատանիզմը: Ես լավ գիտեմ աստվածաշունչը, ինձ համար հասկանալի չէ, թե ինչ է սատանիզմը: ՀՀ-ում հիմա սակավագիտության եւ լայնամտության պայքար է: Հիմա մեկը որ հրաժարական պահանջողներից մեկի բեղերին նայի՝ կասի սատանիստական բեղեր են…եկեք չափորոշիչները հասկանանք: Այդտեղ մարդիկ կան, նաեւ՝ քաղաքական գործունեությամբ հայտնի, կարող են լինել մեկնաբանություններ, որ նրանք ոգեշնչվում են սատանայից, որովհետեւ կոռուպցիայից ավելի սատանիստական բան ես չեմ պատկերացնում: Սեփական զինվորին եւ ժողովրդին թալանելուց ավելի սատանայական բան չեմ պատկերացնում: Եւ այդ շրջանակներում եղել են մարդիկ, որոնք ոչ միայն հրաժարական չեն պահանջել, այլեւ սատանիստական կաթսայից ուտելիս են եղել եւ հիմա կարծես դեպրեսիայի մեջ են, որ գդալ չկա, ուտելուց զրկվել են…»:
Ներկայացման առնչությամբ Փաշինյանը հավելեց. «Նախարարությունը, հաշվի առնելով քննադատությունները, ֆինանսավորվող ծրագրերի մեխանիզմը կատարելագործելու մասին է մտածում, որպեսզի ներկայացման մասին պատկերացում լինի ոչ միայն թղթի վրա, այլեւ վիզուալ»:
Փաշինյանը նաեւ ասաց՝ արվեստը նրանով է արվեստ, որ միշտ չէ միանշանակ: Որպես օրինակ նա նշեց, որ ժամանակին անվանարկում էին Փարաջանովին, Բուլգակովին, Չարենցին…
Լուիզա ՍՈՒՔԻԱՍՅԱՆ
