ԵՊՀ բանասիրության եւ պատմության ֆակուլտետների դասախոսները մեկօրյա նախազգուշական գործադուլ են սկսել` ընդդեմ Հայոց լեզու, գրականություն եւ Հայոց պատմություն առարկաները հայեցողական դարձնելու հայտնի նախագծի: Aravot.am-ի հետ զրույցում ԵՊՀ բանասիրական ֆակուլտետի դեկան Արծրուն Ավագյանը հաստատեց մեր ունեցած այս տեղեկությունը:
«Այո, ընդհանուր կոլեկտիվի ժողով է եղել, եւ հայտարարվել է մեկօրյա նախազգուշական գործադուլ, նաեւ ուսանողներին կոչ ենք արել վերադառնալ դասերի: Ոուսանողներին համերաշխություն ենք հայտնել, բայց ոչ քաղաքական առումով, այլ լեզվի, գրականության եւ պատմությանը վերաբերող նրանց ընդվզման: Մնացած հարցերի հետ մենք ոչ մի կապ չունենք, ոչ Արայիկ Հարությունյանի հրաժարականի հետ, ոչ էլ այլ խնդիրների հետ»,-ասաց ԵՊՀ բանասիրական ֆակուլտետի դեկանը:
Խնդրեցինք նաեւ անդրադառնալ շրջանառվող այն տեսակետին, որ հայոց լեզուն, հայոց պատմությունը դպրոցում անցնելը բավարար է, եւ իմաստ չունի նույնը կրկնել բուհում: «Նման տեսակետ հայտնողները չգիտեն դպրոցը: Դպրոցում բոլորովին ուրիշ, հասարակական միջնակարգ կրթություն են տալիս, մինչդեռ բուհում իրավաբանի համար իրավաբանական ծրագրեր ունենք, որտեղ բոլորովին ուրիշ բովանդակություն է, համալսարանում քերականություն չեն սովորեցնում, այնտեղ բոլորովին ուրիշ խնդիրներ են կիրառվում: Կամ, օրինակ, ֆիզիկոսների համար ուրիշ ծրագիր է իրականացվում, մաթեմատիկոսների համար` այլ բան, քիմիկոսների համար` նույնպես: Այնպես որ, մեկը մյուսի հետ կապ չունի: Եթե դպրոցում գիտելիքներ են, քերականություն ու չգիտեմ ինչեր են սովորեցնում, այն էլ տարիքային փոքր հասակում, պատկերացնո՞ւմ եք, թե ինչ ըմբռնումներ կարող են լինել: Եվ եթե 5000 դիմորդներից 1000-ից ավելին կտրվում է քննություններին հայոց լեզվից ու պատմությունից, դա նշանակում է, որ դպրոցն այսօր բավարար կրթություն չի տալիս ոչ հայոց լեզվից ու գրականությունից, ոչ պատմությունից: Հարցադրումների, բովանդակության, դաստիարակության, ոգեղենության առումով ո՞նց կարելի է նույնացնել դպրոցում ու բուհերում դասավանդվողը: Բուհերում, կրկնում եմ, բոլորովին այլ բովանդակություն ունի հայոց լեզու, գրականություն եւ պատմություն առարկաների ուսուցումը»,-շեշտեց պարոն Ավագյանը:
Գոհար ՀԱԿՈԲՅԱՆ
Կարդացեք նաև
Լուսանկարը` ԵՊՀ-ի կայքից
