Երեկ Փարիզում՝ ՅՈՒՆԵՍԿՕ-ի կենտրոնակայանում, որտեղ անցկացվում էր ՅՈՒՆԵՍԿՕ-ի 40-րդ գլխավոր կոնֆերանսը, հանդիպեցինք վերջին շրջանի ամենասկանդալային համարվող նախարարին՝ կրթության, գիտության ու տարատեսակ հարցերի նախարար Արայիկ Հարությունյանին։ Նա ասաց, որ երեկ կեսօրին է ժամանել Փարիզ, վաղը վերադառնալու է, իսկ Փարիզ է եկել՝ մասնակցելու նախարարական գագաթնաժողովին։ Եվ մինչ Հարությունյանը Փարիզում կոնֆերանսի է մասնակցում, այդ նույն ընթացքում Երեւանում նրա հրաժարականն են պահանջում։
Որոշ ժամանակ անց ՅՈՒՆԵՍԿՕ-ի կենտրոնակայան ժամանեց նաեւ վարչապետ Նիկոլ Փաշինյանը, ում շենքի ներսում դիմավորեց Արայիկ Հարությունյանը։ Մինչ այդ մենք նրան մի քանի հարց ուղղեցինք Երեւանում իր շուրջ ծավալվող իրադարձությունների շուրջ։
– Պարոն Հարությունյան, մինչ Դուք գտնվում եք Փարիզում, Երեւանում Ձեր հրաժարականն են պահանջում։
– Ես կարծում եմ՝ մենք լուծումներ կգտնենք։
Կարդացեք նաև
– Ի՞նչ լուծումներ եք պատրաստվում գտնել։
– Մենք ասել ենք, որ պատրաստ ենք ցանկացած խմբի հետ իրենց մտահոգությունները քննարկենք, եթե նման կարիք կամ ցանկություն կա։
– Կարող է տպավորություն ստեղծվել, թե Դուք այդ ցույցերից, Ձեր հրաժարականի պահանջից եք «փախել» եկել Փարիզ։
– Սա ամիսներ շարունակ պատրաստվող այց էր, հրամանն էլ եղել է մինչեւ հայտնի դեպքերը։
– Եթե, ամեն դեպքում, ցուցարարները որոշեն փողոց փակել կամ արգելափակել Ձեր ելումուտը նախարարության շենք, ի՞նչ կանեք։
– Մենք պատրաստ ենք խոսել բոլոր թեմաներով։
– Դուք նախկինում էլ էիք ասում, որ պատրաստ եք խոսել բոլոր թեմաներով։
– Ցանկացած խումբ, որը կդիմի քննարկելու, պատրաստ ենք քննարկել։
– Սերժ Սարգսյանն էլ էր հեղափոխությունից առաջ պատրաստ խոսելու, բայց դուք չլսեցիք նրան ու որոշեցիք փողոցները փակել եւ մերժել նրան։
– Միանշանակ, սրանք տարբեր իրավիճակներ են։
– Հրաժարականի պահանջի տրամաբանությունը, սակայն, նույնն է։
– Ես արդեն, կարծում եմ, պատասխանեցի այդ հարցին։
– Եթե ցուցարարները չցանկանան Ձեզ հետ խոսել. Ձեզ լսել եւ ուղղակի փակեն Ձեր ճանապարհը, ի՞նչ պետք է անեք այդ ժամանակ։
– Կարծես թե այնտեղ ինչ-որ ճանապարհ արդեն փակ է, ցույցերը, բողոքի ակցիաները շարունակվում են, էսօր իմացա՝ ավելի քիչ են, բայց… նորմալ գործընթաց է։
– Չե՞ք մտածում, որ մարդիկ կարող են ձեր կիրառած գործիքակազմը կիրառել ձեր իսկ դեմ։
– Ոչ, դա մեր ամենամեծ ձեռքբերումներից է։
Վահե ՄԱԿԱՐՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում
