ԱԺ լիագումար նիստում շուտով քննարկվելու է քրեական ենթամշակույթը կրողների, այսպես ասած՝ գողականների ու օրենքով գողերի մասին օրենքի նախագիծը:
Այսօր Aravot.am-ը ԲՀԿ խմբակցության ղեկավար Գագիկ Ծառուկյանին հարցրեց, թե ի՞նչ դիրքորոշում ունի այդ նախագծի հետ կապված, կո՞ղմ է, որ գողականներին քրեական պատասխանատվության ենթարկեն: Նա պատասխանեց. «Մենք էդ հարցը քննարկել ենք, համապատասխան այսօր դուք կարող եք բոլոր լրատվական ծառայություններով լինել 334 սենյակում ժամը 13:30, ԲՀԿ-ն ներկա կլինի, լիարժեք ասուլիս կտա: Էսօր մեր համար հիմնական խնդիրը մեր երկրում ցանկացած հանցագործություն պատժելն է: Եթե ուզում ենք հանցագործության պատժի միջոցները կրկնապատիկ, եռապատիկ դարձնենք, մենք նույնպես կողմնակից ենք: Բայց հիմնական այն, ինչ իրենք ներկայացնում են այդ ծրագրում, պետք է շեշտադրում լինի, թե ո՞ր հանցանքի համար, ո՞րն է հանցանք ընդունված սահմանադրական կարգով, որ պատժելի լինի: Թե չէ օդի մեջ գրելով՝ հիմնավորումներ չկան: Մենք պատրաստ ենք, ցանկացած հանցագործություն թող ներկայացնեն, որը մեր Սահմանադրությամբ, Քրեական օրենսգրքով պատժելի է, սարքենք 5 անգամ շատ: Երկու տարի է՝ սարքենք 8 տարի, 10 տարի: Բայց մարդու իրավունքներ կան, կա հանցանք, հանցակազմ, պետք է հանցանք-հանցակազմ լինի, որ ասենք թե մարդու իրավունքների խախտում չլինի: Սա է հիմնականը»:
Հարցին՝ դուք օրենքով գողերի հետ շփվե՞լ եք, քրեական հեղինակությունների հետ շփվե՞լ եք՝ Ծառուկյանը չպատասխանեց ու մտավ աշխատասենյակ: Նրա փոխարեն ԲՀԿ խմբակցության պատգամավոր Արայիկ Աղաբաբյանը հեգնեց, թե «շփվել ենք մենք, արի բացատրենք»:
Հարցրեցինք՝ քրեական պատասխանատվության պե՞տք է ենթարկել քրեական ենթամշակույթ կրողներին՝ Աղաբաբյանը պատասխանեց. «Եթե կա հանցանք՝ հա, հանցանք եթե չկա՝ ի՞նչ պատասխանատվություն»:
Կարդացեք նաև
Հարցին՝ այս օրենքին, որը բերել են իշխանությունները, դուք դե՞մ եք՝ Աղաբաբյանը պատասխանեց. «Եթե մարդը հանցանք է գործել, պետք է պատժվի, իսկ եթե ոչ՝ ոչ»:
Հռիփսիմե ՋԵԲԵՋՅԱՆ
