ԱԺ հերթական նիստում այսօր պատգամավորները քննարկում են «Իմ քայլի» պատգամավոր Աննա Կարապետյանի հեղինակած օրինագիծը, որով ԱԺ նախագահին մշտապես իրավունք է տրվում մասնակցելու ՀՀ Անվտանգության խորհրդի նիստերին: «Նրան քվեարկության իրավունք չի տրվում: Դա կարող են անել միայն ԱԽ անդամները, բայց ԱԺ նախագահն իրավունք ունի ներկայացնելու առաջարկներ՝ քննարկվելիք հարցերի եւ օրակարգի վերաբերյալ»,-ներկայացնելով օրինագիծը՝ ասաց Աննա Կարապետյանը: Նրա խոսքով՝ ԱԺ նախագահը գերկարեւոր պաշտոն է եւ պետք է ունենա այդ իրավունքը. «Նա պետք է ներկայացնի ԱԺ-ի հավաքական կամքն ԱԽ-ում»:
Պատգամավոր Արման Բաբաջանյանը հետաքրքրվեց. «Ի՞նչ ասել է «հավաքական կամք»: Եթե նման կամքի մասին ենք խոսում, պետք է դիտարկենք նաեւ խմբակցության ղեկավարներին եւ ՀՀ նախագահին ԱԽ-ում ներառելու հարցը»: Աննա Կարապետյանն արձագանքեց. «Եթե ինձ մնար, կասեի, որ ԱԺ պետաիրավական, պաշտպանության եւ անվտանգության, արտաքին հարաբերությունների հանձնաժողովների նախագահները, ինչպես նաեւ՝ խմբակցությունների ղեկավարները եւս կունենային այդ հնարավորությունը: Բայց սահմանադրությամբ նման լիազորություն տրված է ԱԺ նախագահին միայն»:
Լուիզա ՍՈՒՔԻԱՍՅԱՆ
