Այս համեղ, օգտակար եւ նաեւ՝ գրավիչ տեսքով ուտեստը կարելի է պատրաստել ինչպես տավարի, այնպես էլ՝ խոզի կամ հավի մսով: Ցանկալի է վերցնել ոչ ջլոտ փափկամիս:
Անհրաժեշտ մթերքները
Տավարի (կամ խոզի կամ հավի) փափկամիս- 300-400 գրամ
Սոյայի թանձրուկ-4-5 ճաշի գդալ
Կարդացեք նաև
Սոխ-1 գլուխ
Սխտոր-3 պճեղ
Գազար-1 հատ
Թարմ կարմիր պղպեղ- 1 հատ
Թարմ կանաչ կամ դեղին պղպեղ-1 հատ
Դդմիկ-1 հատ
Բրոկոլի- մի փոքրիկ գլուխ
Կոճապղպեղ- 2-3 սմ-անոց կտոր (պարտադիր չէ)
Կանաչ սոխ- 4-5 ճյուղ
Բուսական յուղ- 4-5 ճաշի գդալ
Աղ, սեւ եւ կարմիր պղպեղ- ըստ ճաշակի
Պատրաստման եղանակը
Սկզբում պետք է նախապատրաստել միսը: Ընդ որում, միսը կարող եք նախապատրաստել 2-3 օր առաջ: Հարկավոր է կտրատել երկար-բարակ ձողիկներով՝ «ժյուլյեն» կտրվածքով: Կտրատեք, լցրեք որեւէ ամանի մեջ, ավելացրեք սոյայի թանձրուկը, մեկ պճեղ մանր կտրատած սխտորը եւ մանր կտրատած կոճապղպեղը, լավ խառնեք, ծածկեք պոլիէթիլենային թաղանթով կամ փայլաթիթեղով եւ դրեք սառնարան: Ինչպես նշեցի՝ կարող է այդպես մնալ մինչեւ երեք օր, դրանից միայն ավելի փափուկ եւ համեղ կդառնա: Սակայն, եթե նույն օրը պետք է պատրաստեք, գոնե 1-2 ժամ պետք է մարինացվի, այդ դեպքում ավելի լավ է սառնարան չդնել:
Բանջարեղենը՝ սոխը, դդմիկը, պղպեղները, գազարը, մնացած սխտորը, կանաչ սոխը մաքրեք, լավ լվացեք եւ կտրատեք նույն՝ «ժյուլյեն» ձեւով՝ ձողիկներով: Բրոկոլիի ծաղկային հատվածը բաժանեք փոքրիկ գլուխների, իսկ պոչի մասը կլպեք, եւ ձողիկներով կտրատեք:
Խորը թավան դրեք կրակին, թող լավ տաքանա, լցրեք միսը՝ առանց ձեթ ավելացնելու, եւ տապակեք մի քանի րոպե:
Հենց միսն ամբողջությամբ գույնը փոխի, ավելացրեք բուսական յուղը, որից հետո բանջարեղենները՝ հետեւյալ հերթականությամբ՝ սկզբում սոխը, ապա՝ գազարը, բրոկոլիի ցողուններն ու սխտորը, քիչ անց՝ դդմիկն ու թարմ պղպեղները: Թողեք մի քանի րոպե տապակվի, ընթացքում պարբերաբար խառնեք:
Ավելացրեք համեմունքները, վերջում՝ բրոկոլիի ծաղկագլխի կտորները եւ կանաչ սոխը եւ անջատեք: Կափարիչով փակեք, թողեք մնա 4-5 րոպե, որից հետո կարող եք մատուցել:
Շատ համեղ է խաշած բրնձի հետ:
Բարի ախորժակ:
Պատրաստեց Մելանյա ԲԱՐՍԵՂՅԱՆԸ
