Այսօր ՀՅԴ ԳՄ անդամներն ասուլիս էին հրավիրել՝ ԿԳՄՍ նախարար Արայիկ Հարությունյանի պահվածքի ու հայտարարությունների մասին իրենց գնահատականները ներկայացնելու:
Նրանք նախարարին անվանեցին «տրոյական ձի», «անպատասխանատու անձ» եւ պահանջեցին ներողություն խնդրել:
Արծվիկ Մինասյանն ասաց, որ եթե Նիկոլ Փաշինյանը պաշտպանում է նույն տեսակետները, ազգային արժեքների ոտնահարման Արայիկ Հարությունյանի վարքագիծը, նույն գնահատականները իրեն էլ են տալու ու ավելի խիստ. «Մենք ակնկալում ենք գոնե ողջամտություն ու ողջախոհություն»:
Լրագրողները փոխանցեցին Արայիկ Հարությունյանի այն փաստարկները, որ ՀՅԴ-ական նախարար Լեւոն Մկրտչյանի օրոք էր, որ դպրոցների կուսակցականացվում էին, քաղաքականացվում էր բուհական համակարգը, կրթական համակարգը առհասարակ, որ Լեւոն Մկրտչյանի պաշտոնավարման ժամանակ կոռուպցիա է եղել: Արծվիկ Մինասյանը պատասխանեց, որ Արայիկ Հարությունյանին պետք է պատասխանատվության ենթարկել՝ իր այդ մտքերի համար. «Ինչ վերաբերում է քաղաքականությանը, Լեւոն Մկրտչյանն օրերս հայտարարեց, որ պատրաստ է բովանդակային բանավեճի: Դե եթե էդքան ցանկություն կա, էդքան վստահ է իր ուժերին, դե թող բանավեճի: Երբ մարդը մտնում է իր պատյանի մեջ ու իրեն թվում է, թե չորս կողմը այլեւս այնպիսի օդ է, ինքը կարող է ամեն ինչ անել: Հիմա ինքը կարող է գնա, Տիգրան Մեծից գա, ես էլ կարող եմ ասել՝ Արայիկ Հարությունյանն ո՞վ էր մինչեւ հեղափոխությունը, ո՞ւմ ֆինանսավորմամբ է կրթություն ստացել»:
Կարդացեք նաև
Լրագրողները հարցրեցին՝ ո՞ւմ՝ Մինասյանն էլ արձագանքեց. «Դուք գնացեք իրեն հարցրեք, ես էստեղ չեմ ասի»:
Դիտարկմանը, որ իսկապես ՀՅԴ-ական նախարար մի քանի շրջան պաշտոնավարել է ու բուհերը եղել են քաղաքականացված՝ Արծվիկ Մինասյանն արձագանքեց. «Եթե օրենքով նախատեսված խախտումներ են տեղի ունեցել, դրա համար պատասխանատվության հստակ մեխանիզմներ կան, փոխարեն սպառնալիքների, թող կոնկրետ հանդես գա: Բանավեճի պատրաստ ենք, քրեականով պետք է գործ անի, հակառակ դեպքում իր նկատմամբ պետք է հարուցվի, ի վերջո կրթական ոլորտում ինքը ի՞նչ է արել: Ուսուցչի արժանապատվությունն է վիրավորում՝ դուք անգլերեն չգիտեք եւ այլն, է՞ս է նախարարի դաստիարակությունը»:
Արծվիկ Մինասյանը գտնում է, որ սա բերելու է համազգային պայքարի, ազգային մտածելակերպով մարդիկ իշխանություններին կքշեն:
Հռիփսիմե ՋԵԲԵՋՅԱՆ
