ԿԳՄՍ նախարար Արայիկ Հարությունյանի հեռացումը պահանջող` ՀՅԴ Հայաստանի Երիտասարդական միության անդամ Քրիստինե Վարդանյանը նշեց, որ պայքարը պատրաստվում են շարունակել մինչ իրենց նպատակի իրականացումը, այն է` նախարարի հրաժարականը:
Aravot.am-ի հետ զրույցում նա ասաց, որ հույս ունեն` իշխանությունները չեն գնա սպառնալիքների եւ այլ գործիքակազմի օգտագործման ճանապարհով: Ապա հավելեց. «Եթե հարցնեք` վախենո՞ւմ եք որեւէ բանից, կպատասխանեմ` ոչ, որովհետեւ վախենալու որեւէ բան չունենք»:
Հարցրինք` ԿԳՄՍ նախարարությունից փորձե՞լ են իրենց հետ բանակցել կամ հանդիպել իրենց ներկայացուցիչների հետ: «Գործընթացը հրապարակային է եղել… Այդ հետքայլը եւ ակնարկը եղել է կարմիր գծերը մի քանի անգամ հատելուց հետո, պիտակավորումներից հետո, սպառնալուց հետո, թե դաշնակցական աշխատակիցներին արկղերով կուղարկի, ամեն օր գործեր կհրապարակի եւ ցուցարարներին անդաստիարակ պիտակավորելուց հետո: Եթե նման ատելությունից հետո ասել, որ պատրաստ է բանակցությունների, այդ դեպքում որն է բանակցությունների իմաստը: Դա անտրամաբանական եւ ջղագրգիռ պահվածք է»,-ասաց նախաձեռնության անդամը:
«Արայիկ Հարությունյանը հայտարարեց, որ հրաժարական կտա, երբ ինքը սեփական աշխատանքը համարի անբավարար, սա ծիծաղելի պնդում է, ի՞նչ ասեմ, թող չհեռանա: Հեռացել են պետությունների առաջնորդներ, դիկտատորներ, միապետներ եւ այնպիսի մարդիկ, որոնք երբեւէ չէին հավատում, որ այդ օրը գալու է: Այնպես որ, չեմ կարծում, թե պարոն Արայիկ Հարությունյանը կլինի պատմության մեջ առաջին բացառությունը, որ կմնա հավերժ այդ պաշտոնին»,-շեշտեց Քրիստինե Վարդանյանը:
Կարդացեք նաև
Հիշեցնենք, որ վարչապետ Նիկոլ Փաշինյանը հանդիպել է երիտասարդների հետ, որոնք նրան մետրոյի ժետոն են նվիրել, որ փոխանցի ԿԳՄՍ նախարար Արայիկ Հարությունյանին, որպեսզի վերջինս հրաժարականից հետո կրկին մետրոյով երթեւեկի:
Գոհար ՀԱԿՈԲՅԱՆ
