Նոյեմբերի 7-ին Երեւանի ընդհանուր իրավասության դատարանում (նախագահող դատավոր Արմեն Վարդապետյան) տեղի ունեցավ բնապահպանության նախկին նախարար Արամ Հարությունյանի կողմից կաշառք ստանալուն օժանդակելու մեջ մեղադրվող անձանց գործով դատական նիստը:
Նիստը դեռ նոր էր մեկնարկել, երբ վատացավ ամբաստանյալ Արաքս Դիլանյանի ինքնազգացողությունը, ստիպված եղան շտապօգնություն կանչել: Նախագահող դատավորը որոշեց նիստը հետաձգել:
Aravot.am-ի հետ զրույցում ամբաստանյալ Վիկտոր Մարտիրոսյանի պաշտպան Հունան Բաբայանն ասաց, որ հաջորդ նիստի հետ կապված լրացուցիչ կծանուցեն:
Հիշեցնենք՝ գործարար Սիլվա Համբարձումյանը պնդում է՝ 2008 թվականին Արամ Հարությունյանին 14 մլն դոլար կաշառք է տվել, որպեսզի կարողանա 10 հանքավայրերում ուսումնասիրություններ կատարելու թույլտվության լիցենզիա ստանալ, իսկ մեկ տարի անց՝ թույլտվություն ստանալ 25 տարի ժամկետով այդ հանքերը շահագործելու վերաբերյալ: Ըստ քրեական գործի՝ կաշառք ստանալու հարցում Արամ Հարությունյանին օժանդակել են նրա մտերիմ Վիկտոր Մարտիրոսյանը, Արաքս Դիլանյանն ու այլ անձինք: Վիկտոր Մարտիրոսյանն ու Արաքս Դիլանյանն իրենց առաջադրված մեղադրանքը չեն ընդունում:
Կարդացեք նաև
Հունան Բաբայանին հիշեցրինք՝ Սիլվա Համբարձումյանը դատարանի դահլիճում ցուցմունք էր տվել, որ իր և Արամ Հարությունյանի հանդիպումներին գրեթե միշտ ներկա է եղել գործով ամբաստանյալ Վիկտոր Մարտիրոսյանը, և երբ ինքը կաշկանդվել է նրա ներկայությամբ խոսել կաշառք տալու մասին, Արամ Հարությունյանն ասել է, թե Մարտիրոսյանն իրեն մտերիմ անձ է, կարող է հանգիստ լինել:
Մեզ հետ զրույցում Հունան Բաբայանն այս առիթով ասաց. «Այդ հայտարարություններն իրականությանը չեն համապատասխանում, ավելի ուշ փուլում այդ մասին մենք կհայտարարեք, ցուցմունք կտանք»:
Մեր մյուս հարցին՝ գործով նոր հանգամանքներ ի հայտ եկե՞լ են, Հունան Բաբայանը պատասխանեց. «Այս պահին դեռ ապացույցներն են հետազոտվում, սուտ կլինի ասել, որ կա նոր հանգամանք»:
Տաթև ՀԱՐՈՒԹՅՈՒՆՅԱՆ
