Ինչպես տեղեկացրել ենք, այսօր ԱԺ պետաիրավական հարցերի հանձնաժողովի նիստում քննարկվեց կառավարության ներկայացրած «Քրեական օրենսգրքում» փոփոխությունների նախագիծը, որը վերաբերում է քրեական ենթամշակույթ կրող խմբավորումներին:
ԲՀԿ պատգամավոր Գեւորգ Պետրոսյանն արդարադատության նախարար Ռուստամ Բադասյանին հարցրեց՝ «էս երկրում ամենակարեւորը էս հարցե՞րն են: Մեր երկրում առաջընթացի խոչընդոտը քրեական հեղինակություննե՞րն են»:
Պետրոսյանի համար կասկածելի էր՝ ո՞նց են ստուգելու, որ իմանան՝ քրեական բարձրագույն հեղինակություն ունեցող ա՞նձ է, թե՞ ոչ, որ պատժեն. «Ո՞ւմ են հարցաքննելու, որ էսինչը ինքնախաբեությամբ չի ապրում կյանքում: Արդյոք էս երկրում ամենավտանգավորն էն մարդն է, որն իր հեղինակությունն օգտագործելով՝ ասենք թե տարիներով դատական ատյաններում չլուծված գործ կա, մի բառով ասում է՝ ընկեր ջան, էս գումարը, որ վերցրել ես, տար տուր էս մարդուն: Ո՞նց եք ստուգելու, եթե ամեն մեկը իր բալկոնից հայտարարի՝ ես քրեական հեղինակության բարձր աստիճանակարգ ունեցող մարդ եմ, ամբողջ երկրի քննչական մարմինները պետք է գնան դրա հետեւի՞ց: Կարող է մեկը հարբած ժամանակ ուզենա իրեն երեւակայի, ասի՝ ես քրեական հեղինակություն եմ, տղերք ջան, ասեք տենամ ինչ է եղել ձեր մեջ, տանեն մարդուն դատե՞ն»:
Ավելի անկեղծանալով՝ Գեւորգ Պետրոսյանը հայտարարեց. «Ես էն մարդկանցից եմ, որ աշխատանքից ուղիղ տուն չեմ գնում, երբեմն նաեւ տնից միայն ուղիղ աշխատանքի չեմ գալիս, շփվում եմ տարբեր կատեգորիաների հետ: Ես վերջին տարիներին չեմ լսել, որ ՀՀ-ում քրեական հեղինակություն ունեցող մարդիկ այդպիսի անհանգստություն պատճառեն: Ճիշտ է, կան առանձին դեպքեր, բայց չեմ լսել, որ քրեական աշխարհն էսօր ինչ-որ անհանգստություն պատճառեն: Ավելի ուրիշ մարդիկ կան, որ ուրիշ վտանգ են ներկայացնում, ազատության մեջ թրեւ են գալիս, բայց քրեական չեն համարվում»:
Կարդացեք նաև
Բադասյանը պատասխանեց. «Մեր երկրում հանցավորության եւ կոռուպցիայի դեմ պայքարը, այո, առաջնային է, որը պետք է լուծվի: Դուք ասում եք՝ շփվել եմ, խնդիր չեմ նկատել, ես ունեցել եմ հաճախորդ, որին քրեական հեղինակությունը սպառնացել էր իր գործարար հարաբերությունների կապակցությամբ, դա արել էր ոչ թե հարցը կարգավորելու համար, այլ նրանից որոշակի շահ ունենալով, սպառնալով փորձում էր բիզնեսի մեջ փայ մտնելու եղանակով, ուրիշի հարցը լուծելով՝ շահույթ ստանալ: Պե՞տք է, որ պետությունը արձագանքի: Պետք է, որովհետեւ գործարարության վրա է ազդում, անչափահասների վրա է ազդում: Մենք բոլորս ապրում ենք Հայաստանի տարբեր փողոցներում, ձեր ասած տղայական հարաբերութունների մասին չի խոսքը, ունեցել ենք օրինակներ, երբ անչափահասները ներգրավել են նման խմբերում, հետո կատարել են հանցագործություններ, կրակել են, բռնվել եւ այլն: Եթե չլինեին քրեական ենթամշակույթ կրող խմբավորումները, անչափահասները չէին ներգրավվի նման շրջանակներում»:
Բադասյանը նաեւ ասաց, որ Ռուսաստանը, Վրաստանը արդեն կիրառում է այս կարգավորումները, իսկ դա նշանակում է, որ այսպես ասած «գողականների» ներհոսք կարող ենք ունենալ, օրենքով գողերը գան Հայաստան:
Գեւորգ Պետրոսյանը նախարարին հարցրեց՝ «Դուք մոտիկից քրեական հեղինակություն տեսե՞լ եք, էն, ինչը չեք տեսել, պրակտիկ պատկերացում չունեք, անորոշ ձեւով սահմանում եք, որ դատարաններում հայեցողության տե՞ղ լինի»: Նախարարը պատասխանեց. «Չգիտեմ մոտիկի սահմանումը որն է, բայց որոշակի հեռավորությունից տեսել եմ»:
Ըստ պատգամավորի, մարդկանց ճակատագրերի հետ են խաղալու այս նախագծով. «Քրեական հեղինակություններն էլ են մարդիկ, ունեն իրենց իրավունքներն ու արժանապատվությունը ու շատերից ավելի բարձր արժանապատվությունը, որոնք ազատության մեջ վխտում են, բայց նախկինում չեն հարուցել «Քրեական օրենսգրքի» զայրույթը…Էդպես է՝ եկեք բոլորին տանենք լցնենք բերդերը, պրծնենք»:
Հռիփսիմե ՋԵԲԵՋՅԱՆ
