«Այդ ո՞նց եղավ, որ մեկ տարվա ընթացքում կենսաթոշակների ու նպաստների համակարգում պարզվեց, որ 3-4 մլրդ դրամ կարելի է խնայել։ Բա ո՞ւր են եղել նախկին տարիներին էդ 3-4 միլիարդ դրամները, ինչո՞ւ չեն ծառայեցվել նպատակներին, ինչո՞ւ մանկատան երեխաների համար մինչեւ հիմա բնակարաններ չեն գնվել, ինչո՞ւ աղքատ ընտանիքներին շանս չի տրվել, որ իրենք իրենց աշխատանքով աղքատությունը հաղթահարեն։ Որովհետեւ ամբողջ համակարգը ծառայեցվել է մեկ բանի՝ հնարավորինս հուսահատեցնել մարդկանց, ծնկած վիճակում պահել»,-այսօր կառավարության նիստում այսպես արձագանքեց վարչապետ Նիկոլ Փաշինյանն՝ անդրադառնալով աշխատանքի եւ սոցիալական հարցերի նախարարության աշխատանքին:
Վարչապետի խոսքով, չնայած քննադատություններին, ինքը գոհ է այս նախարարության աշխատանքից: Վարչապետն ասաց՝ «դուխով շարունակեք»:
Նրա խոսքով, ոչինչ չի մոռացվել, ամեն ինչի համար պետք է լինի պատասխանատվություն. «Եվ այս քաղաքականությունն իրականացրած մարդիկ, օգտվելով Հայաստանի ժողովրդավարությունից, դեռ խոսում են։ Լավ են անում, սահմանադրական իրավունք է։ Բայց ես ուզում եմ ասել՝ ոչ մի բան չի մոռացվել եւ ոչինչ չի մոռացվել, եւ ամեն ինչի համար ժամանակին իր պատասխանը լինելու է։ Ամեն ինչի համար պետք է պատասխան տրվի, ես չգիտեմ՝ այդ պատասխանատվությունը պետք է լինի քրեական, վարչական, թե այլ կերպ, բայց պատասխանատվությունն անխուսափելի է։ Այնպես որ, ես նախարարության գործունեությունից շատ գոհ եմ»։
Լուսինե ԲՈՒԴԱՂՅԱՆ
