«Հոկտեմբերի 27-ի» ահաբեկչության զոհերից Յուրի Բախշյանի կինը՝ Անահիտ Բախշյանը, ահաբեկչության 20-րդ տարելիցին նվիրված կառավարական մակարդակով միջոցառման ակնկալիք ուներ: Նա իր չիրականացված ակնկալիքի մասին հայտնել էր լրագրողներին՝ դժգոհելով, որ այդ օրը չեղավ ոչ միայն կառավարական մակարդակով միջոցառում, այլեւ՝ վարչապետի հստակ ուղերձ:
Կա՞ ր կառավարական մակարդակով միջոցառման անհրաժեշտություն եւ ինչու չկազմակերպվեց մեր հարցին վարչապետի խոսնակ Վլադիմիր Կարապետյանը պատասխանեց. «Հոկտեմբերի 27-ի ոճրագործության 20-րդ տարելիցի կապակցությամբ Ազգային ժողովի այգում տեղի է ունեցել ոգեկոչման արարողություն, որին արդեն երկրորդ անգամ մասնակցել է վարչապետ Նիկոլ Փաշինյանը, ներկա են եղել կառավարության անդամներ, Ազգային ժողովի փոխնախագահներ ու խորհրդարանական խմբակցությունների պատգամավորներ»:
«Շատ հիասթափված եմ այդ պատասխանից, որովհետեւ, կարծում էի՝ մտածելու տեղիք է տվել, բայց, փաստորեն, ստանդարտ մի պատասխան է, որը ոչ միայն չի գոհացնում, այլեւ իմ վիրավորանքը խորացնում է»,- Aravot.am-ին ասաց Անահիտ Բախշյանը՝ անդրադառնալով վարչապետի խոսնակի պատասխանին:
Տիկին Բախշյանի խոսքով, կառավարական մակարդակով միջոցառման ակնկալիք ոչ միայն ինքը, այլեւ հոկտեմբերի 27-ին գրեթե բոլոր զոհվածների հարազատներն են ունեցել. «Որ 20-րդ տարելիցին կլինի կառավարության մակարդակով այնպիսի միջոցառում, որը կարտահայտեր այսօրվա իշխանության քաղաքական տեսակետը: Ի վերջո, դա հանցագործություն էր պետության դեմ, ակնկալում էի՝ պետությունը՝ի դեմս կառավարության, տեր կկանգներ որպես տուժող, որովհետեւ առաջին տուժողը հենց պետությունն էր: Բայց ստացվում է՝ ինչպես տարիներ շարունակ , չգիտեմ՝ ոգեկոչում ասելով ինչ նկատի ունեն, ոչ մի ոգեկոչում էլ չկա, հուշարձանին ծաղիկ դնելը ինչ ոգեկոչում, ոչ մի ոգեկոչում էլ չկա: Այսպես կոչված ոգեկոչման արարողությունից հետո ինչ-որ թեյախմության մեզ հրավիրեցին, որտեղ վարչապետը ներկա չէր»:
Կարդացեք նաև
Հաշվի առնելով, որ հոկտեմբերի 27-ի տուժողների իրավահաջորդները կարծում են, որ «Հոկտեմբերի 27-ի» գործի վերաբացման համար իշխանության կամքն ու շահագրգռվածությունն է պետք, վարչապետն ինչ դիրքորոշում ունի գործի վերաբացման հարցում. այս հարցին վարչապետի խոսնակը պատասխանեց. «Վարչապետը բազմիցս հայտարարել է, որ վճռական է Հայաստանում տեղի ունեցած հանցագործությունների բացահայտման ուղղությամբ»:
«Չեմ բացառում, որ քաղաքական կամք կա, բայց այդ քաղաքական կամքը ցույց տվող քայլերն են բացակայում: Անձամբ ինձ, հոկտեմբերի 27-ին Ազգային ժողովի բակում վարչապետն ասաց՝ երբ որ նոր հանգամանքներ կլինեն, կվերաբացվի, ասացի՝ մենք ձեզ կհուշենք այդ նոր հանգամանքները: Հանգամանք առաջին՝ գլխավոր դատախազին եմ դիմել՝ խնդրելով ինձ տրամադրել 2004 թվականի նոյեմբերի 11-ին քննչական կոմիտեի ղեկավարի կողմից կայացված որոշումը, որով կարճվել է քրեական գործը. մենք չենք տեսել ու չունենք այդ կարճման որոշումը, հիմա պահանջել եմ ե՛ւ այդ որոշումը, ե՛ւ այն ուղեկցվող գրությունը, որով պետք է փաստեին, որ ես ստացել եմ կարճման որոշումը»,- ասաց տիկին Բախշյանը:
Արփինե ՍԻՄՈնՅԱՆ
