«Ակնկալվում է համագործակցությունը խորացնել նաեւ տնտեսության ոլորտում: Մենք խոսեցինք պարոն նախագահի հետ, որ Հայաստանը կարող է դառնալ Հունաստանի համար դարպաս դեպի ԵԱՏՄ: Հունաստանը Հայաստանի միջոցով կարող է մուտք ունենալ դեպի 200 միլիոնանոց շուկա»,-այսօր Հունաստանի նախագահ Պրոկոպիոս Պավլոպուլոսի հետ համատեղ ասուլիսի ժամանակ նախագահական նստավայրում ասաց ՀՀ նախագահ Արմեն Սարգսյանը:
ՀՀ նախագահը նաեւ հայտնեց, որ Հունաստանի նախագահի հետ քննարկել են ՀՀ քաղաքացիների համար Եվրամիության մուտքը պարզեցնելու հարցը:
Արմեն Սարգսյանի խոսքի մանրամասները՝ տեսանյութում
Կարդացեք նաև
Հունաստանի նախագահն ասաց.«Շնորհակալություն եմ հայտնում ջերմ հյուրընկալության եւ ընդունելության համար: Այս այցը նոր հեռանկարներ է բացում երկու երկրների հարաբերություններում: Հեռանկարներ, որոնք ձեւավորվել են մեր ջանքերի շնորհիվ, որոնք մեր հանդիպումից հետո էլ ավելի են ամրապնդվելու եւ շարունակվելու են»: Նա իր ելույթում հիշեցրեց հայերի եւ Պոնտոսի հույների ցեղասպանությունները՝ նշելով, որ իրենք երբեք չեն մոռանա այն մղձավանջերը, որոնց միջով անցել են երկու ժողովուրդները:
Ասաց, որ Թուրքիան պետք է հաշտվի իր պատմության հետ եւ պատասխան տա. «Մենք պետք է հիշենք ցեղասպանությունները, որպեսզի երբեւիցե դա տեղի չունենա: Մենք ուրախ ենք, որ օրեր առաջ ԱՄՆ ներկայացուցիչների պալատն ընդլայնեց ցեղասպանությունը ճանաչածների շրջանակը: Մենք 1996թ. խորհրդարանի մակարդակով ճանաչեցինք հայերի ցեղասպանությունը, սահմանեցինք ապրիլի 24-ը հայերի ցեղասպանության օր, եւ 2014թ. քրեականացրեցինք հայերի ցեղասպանության ժխտումը: Ուզում եմ շնորհակալություն հայտնել, որ ՀՀ Ազգային ժողովի կողմից միաձայն ճանաչեցիք Պոնտոսի հույների ցեղասպանությունը: Այստեղից մենք ուղերձ ենք ուզում ուղարկել դեպի Թուրքիա: Նա պետք է հաշտվի իր պատմության հետ, պատասխան տա, պետք է ներողություն խնդրի»:
Հունաստանի նախագահն անդրադարձավ նաև երկու ժողովուրդների սփյուռքերին. «Մեր ժողովուրդների սփյուռքերը ևս համագործակցում և աշխատում են: Մենք մեծ տարածքներ չունենք, չունենք մեծ բնակչություն, մեր սփյուռքի պատճառով մենք չունենք սահմաններ, մեր սփյուռքը բաղկացած է այն անձանցից, որոնք ծաղկում են և երբեք չեն մոռանում իրենց հայրենիքը, դա ամենամեծ ձեռքբերումն է Հայաստանի և Հունաստանի սփյուռքերի»:
Լուսինե ԲՈՒԴԱՂՅԱՆ
