ԲՀԿ պատգամավոր Գեւորգ Պետրոսյանն առաջարկում է «Բաժնետիրական ընկերությունների մասին» օրենքում փոփոխություն կատարել: Այսօր ԱԺ առողջապահության եւ սոցիալական հարցերի հանձնաժողովի նիստում այս նախագծի քննարկման ժամանակ Պետրոսյանն ասաց. «Մի օր ԲԲԸ-ի տնօրենին կանչում, ասում են՝ դու ազատվում ես զբաղեցրած պաշտոնից ու որեւէ բացատրություն չեն բերում: Սա հակասում է միջազգային կոնվենցիաներին, մարդուն առանց պատճառի չի կարելի աշխատանքից ազատել եւ վերջ: Բաժնետիրական ընկերության տնօրենը չի դադարում վարձու աշխատող համարվելուց»:
Կառավարությունը բացասական դիրքորոշում է հայտնել: Գեւորգ Պետրոսյանի խոսքով՝ «Եթե մարդը մեղք չի գործել, ինչի՞ ենք բաժնետիրական ընկերության տնօրենին դնում մի հատ իրավիճակի մեջ ու ասում ենք՝ քեզ կարող են առանց պատճառի աշխատանքից ազատել: Պետք է հիմք լինի, ոչ թե կանգնեն ասեն՝ գիտես ինչ կա, դու վաղվանից չպիտի գաս աշխատանքի: Դա երաշխավորված աշխատանքի իրավունքի սկզբունքին հակասում է: Մարդուն աշխատանքից ազատելիս պետք է հարգելի պատճառ ունենալ: Դա պարտականություն է»:
Հարակից զեկուցող, «Իմ քայլի» պատգամավոր Հերիքնազ Տիգրանյանն ասաց, որ ԲԲԸ տնօրենը եւ գործադիր ժողովը կլասիկ աշխատող-գործատու հարաբերություններ չունեն, ուստի հորդորեց դեմ քվեարկել նախագծին:
Գեւորգ Պետրոսյանն ասաց. «Մենք չենք ասում տնօրենից մի ազատվեք, այլ օրենքով նախատեսված հիմքով նրան ազատեք: Ես չեմ ասում անբարեխիղճ տնօրեններին եկեք պաշտպանության տակ վերցնենք, ո՞վ է նման բան ասում: Ասում եմ՝ եթե կա պատճառ, ձեւակերպենք օրենքով, հակառակը հակասում է մի շարք սկզբունքների»:
Կարդացեք նաև
Ավելի ուշ Պետրոսյանն ասաց, որ փաստեր ունի, թե ինչպես են վարվել պետական բաժնետիրական ընկերություններում տնօրենների հետ. «Տնօրենները մեխանիկորեն ազատվում են աշխատանքից, որովհետեւ փոխվում է նրան աշխատանքի ընդունող պաշտոնյայի քաղաքական պատկանելությունը: Ես փաստերով կարող եմ ասել, մարդուն կանչել, ասել են՝ մեզ չի հետաքրքրում դու ոնց ես աշխատում, էսօր ես եմ պաշտոնյան (չեմ ասի՝ որ պաշտոնյան), որը նշանակելու իրավունք ունի, հաջողություն քեզ: Մարդը դատական կոնֆլիկտից խուսափելու համար դիմումը գրել, գնացել է»:
Պետրոսյանի նախագիծը հանձնաժողովում բացասական եզրակացություն ստացավ՝ 4 կողմ 4 դեմ 1 ձեռնպահ ձայներով:
Հռիփսիմե ՋԵԲԵՋՅԱՆ
