«Ինչպես գիտեք, մենք չենք խառնվում ՀՀ-ի ներքին գործերին: Սա մյուս պետություններին էլ է վերաբերում, առավել եւս, երբ մեզ դա չեն խնդրում: Այդ պատճառով չէի ուզենա մեկնաբանել ՀՀ-ի ներքաղաքական իրավիճակը»,-ՀԱՊԿ խորհրդարանական վեհաժողովի 12-րդ լիագումար նիստի ժամանակ լրագրողների հետ զրույցում այսօր հայտարարեց ՌԴ պետդումայի պատգամավոր Կոնստանտին Զատուլինը:
«Իհարկե, մենք հետեւում ենք ՀՀ ներքաղաքական իրավիճակին, ինչպես դուք եք հետեւում ՌԴ ներքաղաքական իրավիճակին, բայց չէի ուզենա մեկնաբանել»,-հավելեց Զատուլինը:
2018թ-ի ներհայաստանյան իրադարձությանն էլ, երբ իշխանության եկավ Նիկոլ Փաշինյանը, Զատուլինն այսպիսի բնորոշում տվեց. «Այո, անձերի փոփոխություն տեղի ունեցավ եւ բավականին լայնածավալ: Ոչ միայն առաջին դեմքերի, այլեւ բոլոր ենթակառուցվածքների փոփոխության մասին է խոսքը, այդ թվում՝ հատուկ ծառայություններ, Ազգային ժողով»:
Լուիզա ՍՈՒՔԻԱՍՅԱՆ
