Ինչպես արդեն տեղեկացրել ենք, Երևանի ընդհանուր իրավասության դատարանում (նախագահող դատավոր Աննա Դանիբեկյան) նոյեմբերի 5-ին շարունակվեց ՀՀ երկրորդ նախագահ Ռոբերտ Քոչարյանի և մյուսների գործով դատական նիստը: Նիստին մասնակցում են Ռոբերտ Քոչարյանը, Սեյրան Օհանյանը, Յուրի Խաչատուրովը, Արմեն Գրիգորյանը: Ռոբերտ Քոչարյանի պաշտպանները ներկայացրին Ռոբերտ Քոչարյանի խափանման միջոց կալանքը գրավով փոխարինելու մասին միջնորդություն: Պաշտպան Հայկ Ալումյանը նշեց. «Ռոբերտ Քոչարյանի խափանման միջոցի վերաբերյալ միջնորդության անհրաժեշտություն առաջացել է ՍԴ որոշումներից մեկից հետո: Որոշումը կայացվել է նախորդ դատական նիստից հետո՝ հոկտեմբերի 15-ին»:
Այս առիթով առարկություն հայտնեցին մարտի 1-ի տուժողները և նրանց իրավահաջորդները: Տուժողի իրավահաջորդ Էդիկ Հարությունյանը դատարանի դահլիճում հայտարարեց. «Երբ դեռ Ռոբերտ Քոչարյանը նախագահ էր, 2008-ի մարտի 4-ին ՀՀ վարչապետ Սերժ Սարգսյանը հայտարարեց, որ ունեն տեսախցիկներ, որ ֆիքսել են բոլորը, թե ով, ում է սպանել, ովքեր են մեքենաներ վառել ու թալանել խանութներ և ՀՔԾ են ուղարկել, մեր իրավաբանները այդ գործը վեր կհանեն: Ի՞նչն է խանգարում փաստաբաններին այդ նյութերը բերեն, դնեն դատարանի առաջ»:
Մարտի 1-ի տուժող Գոռ Քլոյանի հայր Սարգիս Քլոյանը դատարանի դահլիճում ասաց. «Ռոբերտ Քոչարյանին ճանաչելով 25 տարի՝ իշխանության տարիներին, հետո թե՛ բիզնեսով, թե՛ առյուծ որսալով, թե՛ Աֆրիկայում անտիլոպներ որսալով, թե՛ ահաբեկելով, նրան անհնար է ազատ արձակել: Մեկուկես տարի է՝ փաստաբաններն ասում են՝ երկնքից է իջել, ոտքերը ամպոտ են, ազատ արձակենք: Մարդիկ կան դեռ նրա հանցանքի պատճառով մահանում են, կինս սպորտսմենուհի մահացավ, հիմա նստել ենք ձվի մեջ մազ ենք ման գալիս՝ անընդհատ 301 հոդվածը: Հանցանքը կատարվել է: Եթե ՀՀ օրենսգրքի բոլոր հոդվածները վերագրենք Ռոբերտ Քոչարյանին, դա քիչ է: Եթե նա ազատ արձակվեց, Աֆրիկայում էլի անտիլոպներ է որսալու»:
Տաթև ՀԱՐՈՒԹՅՈՒՆՅԱՆ
