ՀՀ առողջապահության նախարար Արսեն Թորոսյանի նախաձեռնությամբ նոյեմբերի 4-ին տեղի է ունեցել հանդիպում ՀՀ ԱԺ «Լուսավոր Հայաստան» խմբակցության պատգամավորների հետ։
Նախարարը ներկայացրել է Կառավարության հեղինակած «Ծխախոտային արտադրատեսակների եւ դրանց փոխարինիչների օգտագործման հետեւանքով առողջությանը հասցվող վնասի նվազեցման եւ կանխարգելման մասին» օրենքի նախագիծը։ Արսեն Թորոսյանը նշել է, որ նպատակն է ներկա եւ ապագա սերունդներին պաշտպանել առողջության վրա ծխախոտահումքի, ծխախոտային արտադրատեսակների եւ դրանց փոխարինիչների օգտագործմամբ պայմանավորված բացասական ազդեցությունից, ծխի վնասակար հետեւանքներից, ինչպես նաեւ ապահովել բնակչության ընկալումներում ծխախոտի օգտագործումն որպես անառողջ եւ մերժելի վարքագիծը:
Ծխախոտի օգտագործումը կարգելվի փակ, կիսափակ, բաց հանրային տարածքներում, այդ թվում՝ նախադպրոցական, հանրակրթական ուսումնական հաստատություններում, խաղահրապարակներում, պուրակներում եւ այլ հանրային վայրերում։
Պատգամավորները բարձրաձայնել են հարցեր, որոնք առնչվել են ծխախոտի գների բարձրացման հետեւանքով կեղծ կամ անհայտ ծագման սիգարետների շրջանառության ավելացմանը, փոքր ու միջին տնտեսվարողների, ծխախոտ արտադրող կազմակերպությունների հնարավոր տնտեսական վնասներին եւ այլ խնդիրների։
Արսեն Թորոսյանի խոսքով՝ սիգարետների գներն ավելի արագ պետք է աճեն՝ քան քաղաքացիների եկամուտները, քանի որ, ըստ նրա, բարձր գինը մարդկանց կստիպի հրաժարվել ծխախոտ օգտագործելու վատ սովորությունից։
ՀՀ Ազգային ժողով
