Ինչպես արդեն հաղորդել ենք, Կադաստրի կոմիտեի ղեկավարի տեղակալ Լևոն Մելիքյանն այսօր պաշտոնից ազատվելու դիմում է ներկայացրել ՀՀ վարչապետին։ Ի դեպ, Կոմիտեի ղեկավարի պարտականությունները նոյեմբերի 1-ից վերապահված են Լևոն Մելիքյանին։
Այս ազատման մասին լուրն իր ֆեյսբուքյան էջում կիսելով՝ Կադաստրի կոմիտեի նախկին ղեկավար Սարհատ Պետրոսյանը հավելել է. «Իմ հայտարարության նախնական տարբերակում նախատեսում էի նշել, որ ինձ հետ միասին ազատման դիմումներ են ներկայացնելու նաեւ իմ մի շարք գործընկերները, սակայն ավելի ուշ որոշեցի չգրել այդ մասին, որեւէ կերպ չկաշկանդելով նրանց։
Մենք որպես թիմ միասին եկել էինք փոփոխություն բերելու, եւ այժմ էլ հեռանում ենք որպես մեկ միասնական թիմ։ Սա մեկ անգամ եւս վերահաստատում է, որ մեզ հաջողվել է ձեւակերպել միասնական տեսլական ու արժեքային համակարգ։ Հույս ունեմ, որ նույն կազմով դեռ կկարողանանք օգտակար լինել մեր երկրին։
Սպասեք ավելին»:
Կարդացեք նաև
Ինքը՝ Լևոն Մելիքյանն «Առավոտին» ասաց, որ նախ, մասնագիտական, ապա նաև քաղաքական էթիկայից ելնելով է վարչապետին խնդրել իրեն ազատել զբաղեցրած պաշտոնից՝ «քանի որ ամբողջովին կիսում եմ Կադաստրի կոմիտեի պաշտոնաթող ղեկավար Սարհատ Պետրոսյանի մտահոգությունները և ստեղծված իրավիճակում նպատակահարմար չեմ համարում շարունակել պաշտոնավարումս»։
