«Ստալինյան ժամանակների չուգունի ձուլման էպոպեան ուսումնասիրելու փոխարեն Ալոյանը լավ կաներ ևս մեկ անգամ վերընթերցեր իր հոր ՝ Ամուլսարով հիմնավորապես զբաղված գիտնականի եզրակացությունն` Ամուլսարի շահագործման վտանգավորության և բնապահպանական ռիսկերի մասին»,- Aravot.am-ի հետ զրույցում ասաց ԲՀԿ խմբակցության պատգամավոր Նաիրա Զոհրաբյանը:
Հիշեցնենք, ԲՀԿ խմբակցության պատգամավորներն օրերս եղել էին Ամուլսարում, հանդիպել և զրուցել է բնակիչների հետ: Այցից հետո հարցազրույցներից մեկում, Նաիրա Զոհրաբյանն ասել էր, որ չի տեսել ոչ մեկին, որ կողմ լիներ Ամուլսարի հանքի շահագործմանը:
«Լիդիան Արմենիա» ընկերության տնօրեն Հայկ Ալոյանն էլ հակադարձել էր պատգամավորին`ասելով. «Երկրի համար ամենավատ բանն է, երբ քիչ չէ, որ ներդրումները չեն պաշտպանվում օրենքով, մի հատ էլ՝ ամենատարբեր քաղաքական ուժեր հարձակվում են ներդրման վրա՝ տարբեր քաղաքական նպատակներով: Նման երկրներից խուսափում են բոլոր ներդրողները: Ներդրողի համար ամենատհաճ բանը քաղաքական հարձակմանը պատասխանելն է: Խորհուրդ կտամ ԲՀԿ պատգամավորներին գիշեր-ցերեկ Ամուլսարով «մտահոգվելու» փոխարեն մտահոգվեն ցեմենտի գործարանի արտանետումներով ու Մղարթի հանքով: Այլապես իրենց մտահոգություններն Ամուլսարով, նույնն է, թե Ստալինի ժամանակների չուգունի ձուլման գործարանի պատասխանատուները «մտահոգվեն» «Տեսլա»-ի որակով»:
«Ես հասկանում եմ, որ միգուցե Ամուլսարը Հայկ Ալոյանի և Ամուլսարի շահագործմամբ շահագրգռված այլ անձանց համար եկամտի ոսկեբեր երակ է, սակայն, «Բարգավաճ Հայաստանի» և մեզանից յուրաքանչյուրի համար կենսական է Հայաստանի բնապահպանական անվտանգությունը, տվյալ տարածաշրջանի բնակիչների անվտանգությունը: Եվ ինչքան էլ «Լիդիան Արմենիայի» ղեկավարությունը փորձի արհեստական աղմուկի մեջ խլացնել հանրության և գիտնականների մտահոգություններն ու բողոքի ձայնը, մենք դա թույլ չենք տալու»,- հավելեց տիկին Զոհրաբյանը:
Կարդացեք նաև
Ինչ վերաբերում է «Արարատ ցեմենտին», մեր զրուցակիցը ասաց. «Հայկ Ալոյանին իր չակերտավոր մտահոգությունները փարատելու մի կարճ ճանապարհ հուշեմ ՝ հանդիպել «Արարատ ցեմենտի» աշխատակիցների հետ, լսել նրանց և ես վստահ եմ այդ հանդիպումից հետո Aloyan & company –ին հանրային ուշադրությունից շեղելու համար այլևս չի փորձի «Արարատ ցեմենտի» և Մղարթի հանքի հետ կապված կեղծ օրակարգեր ձևավորել»:
Նելլի ԳՐԻԳՈՐՅԱՆ
