Հովհաննես Թումանյանի ծննդավայր Դսեղում, նրա թանգարանի հարեւանությամբ ժողովրդական վարպետ, տիկնիկագործ Անահիտ Աթոյանը յուրատեսակ ցուցասրահ է բացել լքված մեքենայի մեջ:
Այնտեղ իր ստեղծած թեմատիկի ձեռագործ տիկնիկներն են ցուցադրվում:
Ցուցասրահում հպարտորեն տեղավորվել են նաեւ Հովհաննես Թումանյանն ու Կոմիտասը, Քաջ Նազարը, Անուշն ու մյուսները:
Ժողովրդական վարպետն ասում է, որ ցուցասրահ ստեղծելու գաղափարը պատահականորեն է ծագել: Երիտասարդ տարիքից տիկնիկներ է գործում, վերջին տարիներին է որոշել դրանք «տանիքի» տակ առնել:
Իսկ այս տարի մեքենա-ցուցասրահում Կոմիտասի ու Հովհաննես Թումանյանի 150-ամյա հոբելյանների շնորհիվ նրանց շունչն է զգացվում: Միացրած ձայնարկիչից կամ Կոմիտաս է հնչում, կամ Սոս Սարգսյանի թումանյանական ասմունքը:
Կարդացեք նաև
Անահիտ Աթոյանն ասում է, որ շատ հաճախ են զբոսաշրջիկներ գալիս իր ցուցասրահ: «Օրինակ, վերջերս Լիտվայի դեսպանն էր ընտանիքով այցելել: Իրենք անմիջապես Անուշ եւ Կոմիտաս տիկնիկներ վերցրին: Դեսպանը նույնիսկ Կոմիտաս երգեց, ու ես շատ հուզվեցի»,-պատմեց ժողովրդական վարպետը: Հավելեց, որ հաճախ են մարդիկ Կոմիտասի ու Թումանյանի տիկնիկը գրկում, որ լուսանկարվեն ու հուզվում են:
Պարզեցինք, որ սովորական տիկնիկը մեկ շաբաթում է գործում, իսկ կերպարային մեծ տիկնիկների համար ավելի շատ ժամանակ է պահանջվում: Ասում է՝ ամեն տիկնիկը գործելիս հուզվում է, ասես հոգի է դնում նրանց մարմիններում: Ի տարբերություն փոքրերի, մեծ տիկնիկները չի վաճառում, ասում է` անգին են:
Գոհար ՀԱԿՈԲՅԱՆ
Լուսանկարները` Նարեկ Ավագյանի
«Առավոտ» օրաթերթ
02.11.2019
