«Եվրոպայի խորհրդի ներկայացուցիչների հետ քննարկել ենք զուտ աշխատանքային հարցեր` կապված Հայաստանի եւ Եվրոպայի խորհրդի համագործակցությանը, կանանց նկատմամբ եւ ընտանեկան բռնության արգելման վերաբերյալ կոնվենցիաներին»,- այս մասին խորհրդարանում լրագրողների հետ զրույցում ասաց ԱԺ Պետաիրավական հարցերի մշտական հանձնաժողովի նախագահ Վլադիմիր Վարդանյանը:
Հիշեցնենք, այսօր խորհրդարանում ԱԺ մարդու իրավունքների պաշտպանության եւ հանրային հարցերի, Պետաիրավական հարվերի եւ Եվրոինտեգրման հարցերի համատեղ փակ նիստ էր, որին մասնակցում էին նաեւ ԵԽ ներկայացուցիչներ` Վենետիկի հանձնաժողովի փոխնախագահ Վերոնիկա Բելկովան եւ Գրեւիոյի նախագահ Մարսելին Նաուդին: Մամուլում հրապարակումներ եղան, որ փակ նիստում քննարկվելու են Ստամբուլյան կոնվենցիային, դրա վավերացմանը, առկա կարծրատիպերին վերաբերող հարցեր:
«ԱԺ օրակարգում Ստամբուլյան կոնվենցիայի հարց չկա, պաշտոնապես շրջանառության մեջ դրված չէ»,- հայտարարեց Վլադիմիր Վարդանյանը` նկատելով, որ մինչ խորհրդարան հասնելը, հարցը պետք է որոշակի գործընթաց անցնի:
«Պետք է հստակ մի բան հասկանանք՝ Հայաստանը ԵԽ անդամ է, պետք է ընթանանք այդ ճանապարհով. խոսքը չի գնում որեւէ գործընթացի մասին, խոսքը գնում է պարզապես քննարկումների մասին: Ես զարմանում եմ, որ Ստամբուլյան կոնվենցիան այս աստիճանի արձագանք ստացավ, շատ այլ կոնվենցիաներ կան, որոնք վավերացվել են մեր երկրի կողմից, որոնք ավելի մեծ նշանակություն կարող են ունենալ»,- ասաց Վլադիմիր Վարդանյանը` հերքելով, որ այս հարցի շուրջ «գաղտնի դիվանագիտություն» է վարվում:
Կարդացեք նաև
Այլ մանրամասները`տեսանյութում
ԵԽ ներկայացուցիչներն, ի դեպ, չցանկացան լրագրողների հարցերին պատասխանել:
Նելլի ԳՐԻԳՈՐՅԱՆ
